Өчигдрийн /2026.10.28/ УИХ-ын Эдийн засгийн байнгын хорооны хурлаар Засгийн газраас өргөн мэдүүлсэн “Өгөгдлийн тухай” анхдагч хуулийн төслийг хэлэлцлээ.

Энэхүү хуулийн төсөлд МУ-ын Үндсэн хуульд нийцээгүй, мөн гадаадын хуулийн этгээдүүдэд онцгой эрх, давуу тал олгосон, Монгол улсын хууль тогтоомж үйлчлэхгүй агуулгатай ноцтой асуудлууд байгаа талаар УИХ-ын гишүүн П.Батчимэг асуулт асууж хариулт авлаа.

Тэрбээр,

МУ-ын Үндсэн хууль болон Хүний хувийн мэдээлэл хамгаалах тухай хуулиудаар хамгаалагдсан “хүний эмзэг мэдээлэл”-ийг энэхүү хуулийн төслөөр “солилцох, дамжуулах, дахин дамжуулах, төлбөртэй ашиглуулах, хил дамнуулан дамжуулах” боломжийг нээсэн байна.

Мөн гадаадын хуулийн этгээд МУ-ын нутаг дэвсгэрт дата төвийн үйл ажиллагааг ямар ч зөвшөөрөлгүйгээр эрхлэх, үйл ажиллагаа нь халдашгүй байх, МУ-ын эрх бүхий байгууллага огт хяналт, зохицуулалт хийх эрхгүй байх зэрэг үндэсний аж ахуй нэгжүүдэд олгож үзээгүй онцгой давуу эрхийг энэ хуулийн төслөөр бий болгожээ.

Сүүлийн үед Засгийн газар, Цахим хөгжил, инноваци, харилцаа холбооны сайдын зүгээс ногоон технологи, эрчим хүчний үр ашигтай гэх дата төвийг дэмжих, хөрөнгө оруулалт татах нэрийн доор ийнхүү МУ-ын Үндсэн хууль, дотоодын хууль тогтоомжоос давсан хууль, эрх зүйн орчинг бүрдүүлэх гэж байгаа явдалд УИХ онцгойлон анхаарал хандуулах шаардлагатай байна.

П.Батчимэг: "Хүний эмзэг мэдээлэл"-ийг солилцох, дамжуулах, төлбөртэй ашиглуулах боломжийг хуулиар нээж өгөх нь!