А.Ариунзаяа: Хэзээ бид үнэн зөв тайлагнадаг, авсан зээлээ, босгосон бондоо үнэн мөнөөр нь тайлагнаад зарцуулах вэ?

УИХ-ын чуулганы /2026.10.30/-ны өдрийн хуралдаанаар Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуульд өөрчлөлт оруулах тухай хуулийн төсөлтэй хамт өргөн мэдүүлсэн Төсвийн тогтвортой байдлын тухай хуульд нэмэлт оруулах тухай хуулийн төслийг хэлэлцлээ.

УИХ-ын гишүүн А.Ариунзаяа дараах байр суурийг илэрхийллээ.

Нэг удаагийн шинж чанартай асуудлыг Төсвийн тогтвортой байдлын тухай хуульд оруулаад байна. Өмнө нь 2 бүтээн байгуулалтын төсвийг нэгдсэн төсвийнхөө урсгал зардалдаа тооцохгүй гээд нэг удаагийн хууль гаргачихсан. Одоо түүнтэй нэгэн адил зарчмыг Төсвийн тогтвортой байдлын тухай хуульд оруулаад байна. Дараа дараагийн томоохон төслүүдээ яах гэж байгаа юм. Дахиад  өөр арга сэдээд яваад байх уу. Өргөн барьсан хэлбэрийг яаж өөрчилсөн бэ? Төсвийн тогтвортой байдлын тухай хуулиар энэ асуудлыг зохицуулж болж байгаа юм уу?. Ямар асуудал ард нь байгаад энэ хуульд нэмэлт өөрчлөлт оруулж шийдэх гээд байгаа юм бэ?. Иймэрхүү байдлаар урсгал зардлаа нууж хэдэн төсөвтэй болох юм бэ?. Төсвийн бүртгэл, тайлагналтаа суурь асуудлаа хэзээ, яаж, хэрхэн, ямар хугацаанд, ямар төсвөөр өөрчлөх вэ?

Хэзээ бид үнэн зөв тайлагнадаг, авсан зээлээ, босгосон бондоо үнэн мөнөөр нь тайлагнаад зарцуулах вэ? Төсвийн тогтвортой байдлын тухай хуульд хүртэл гар хүрч ноогдол ашгийг зарцуулна гэнэ, хязгаартай тооцохгүй гэнэ үү юу гэсэн үг юм болохгүй. Би үүнийг эрс эсэргүүцэж байна. Өмнө нь 2 төслийг гадна гаргасан. Эрдэнэбүрэний усны цахилгаан станц, газрын тос боловсруулах үйлдвэр. Тухайн бүтээн байгуулалтууд нь буруу гэж хэлээгүй. Үүнийгээ үнэн зөв бүртгээд төсөвтөө суулгаад явах ёстой. Дахиад өөр асуудлыг өөр арга сэдэж Төсвийн тогтвортой байдлын тухай хуульдаа нэг удаагийн өөрчлөлт оруулаад, ганцхан жилийн хугацаанд үйлчлэх асуудлыг оруулж ирж байгаа нь буруу. Үүнийг хүчээр явуулаад л өнгөрөх байх. Гэхдээ буруу гэдгийг дахин дахин архивд үлдээмээр байна. Цаашид яах вэ гэдэг асуудал. Дураараа бүгдээрээ, гишүүд хүртэл Төсвийн тогтвортой байдлын тухай хуульд нэмэлт өөрчлөлт оруулах хуулийн төслүүдийг тогтмол санаачилдаг боллоо. Болимоор байна. Үнэн зөв байя.