Хөршийн харилцаа2 мин унших
Инженерийн боловсрол, судалгааны хамтын ажиллагааг шинэ шатанд гаргана
Боловсролын сайд Л.Энх-Амгалан Өвөр Монголын Аж үйлдвэрийн их сургуулийн төлөөллийг хүлээн авч уулзаж, ШУТИС-тай хөгжүүлж ирсэн 40 жилийн хамтын ажиллагааг өргөжүүлэх, Олон улсын инженерийн сургуулийн үйл ажиллагааг эхлүүлэх бэлтгэл ажлын талаар санал солилцлоо.
Монгол Улсад аж үйлдвэр, эрчим хүч, дэд бүтцийн салбарын хөгжилтэй уялдсан инженерийн хүний нөөц зайлшгүй шаардлагатай. Иймээс инженерийн боловсролын чанарыг сайжруулах, олон улсын түвшний сургалт, судалгааны орчныг бүрдүүлэх нь чухал байгаа.
Монгол Улсын Засгийн газрын 2025 оны 6 дугаар сарын 4-ний өдрийн 284 дүгээр тогтоолоор ШУТИС-ийн салбар Олон улсын инженерийн хамтарсан их сургуулийг байгуулах шийдвэр гаргасан. Улмаар 2025 оны 12 дугаар сарын 31-ний өдрийн 240 дүгээр тогтоолоор тус сургуулийг Хүннү хотод байгуулах асуудлыг шийдвэрлэсэн билээ.
Энэхүү шийдвэрийг бодит ажил болгох, сургалтын үйл ажиллагааг төлөвлөсөн хуваарийн дагуу эхлүүлэхэд хоёр талын хамтын ажиллагаа чухал байгааг Боловсролын сайд Л.Энх-Амгалан тодотгов.
Уулзалтаар анхны элсэлтийг хугацаанд нь эхлүүлэх, хос болон хамтарсан дипломын хөтөлбөр хэрэгжүүлэх, кредитийг харилцан хүлээн зөвшөөрөх зохицуулалтыг тохирох талаар ярилцлаа. Мөн сэргээгдэх эрчим хүч, цахилгаан, химийн инженерчлэл, материал судлалын чиглэлээр хамтарсан судалгаа хөгжүүлэх боломжийг хэлэлцэв.
Нөгөө талаар монгол оюутан залуусын суралцах боломжийг нэмэгдүүлэхэд анхаарах шаардлагатай. Өвөр Монголын Аж үйлдвэрийн их сургуульд 2005 оноос хойш Монголын 500 гаруй оюутан суралцаж төгссөн байна. Цаашид тэтгэлгийн тоо, хэмжээг нэмэгдүүлэх, хамтарсан сургалт, судалгааны боломжийг өргөжүүлэх чиглэлээр үр дүнтэй ажиллах хэрэгтэй.
Энэ хүрээнд Боловсролын яамны Төрийн нарийн бичгийн даргаар ахлуулсан төлөөлөгчид Хөх хотод ажиллаж, ӨМӨЗО-ны Ардын Засгийн газрын дэд дарга Сү Хэтэй уулзан, сургуулийн үйл ажиллагааг дэмжих болон Монгол оюутнуудад олгох тэтгэлгийг нэмэгдүүлэх асуудлыг хэлэлцсэн.
Хамтын ажиллагааны үнэ цэн нь ярьсан зүйлдээ бус, хэрэгжүүлсэн ажил, гарсан үр дүнд оршдог. Тиймээс хоёр тал тодорхой ажлын төлөвлөгөө гаргаж, тохирсон ажлуудаа тууштай хэрэгжүүлэн, Монголын инженерийн боловсролын хөгжил болон залуусын суралцах боломжийг нэмэгдүүлэхэд анхаарч ажиллана.