Монгол хүн Герман, Франц улсад суралцаж эхэлсний 100 жилийн ой тохиож байна

Монгол сурагч, оюутнууд Герман, Франц улсад суралцаж эхэлсний 100 жилийн ойд зориулсан эрдэм шинжилгээний хурал боллоо.

Боловсролын сайд Л.Энх-Амгалан:

Тэртээ 1925 онд Монголын төр засаг 35 сурагчийг Герман, Франц улсад сургаж, эх орныхоо хөгжилд хэрэгтэй мэргэжилтэн бэлтгэх түүхэн шийдвэр гаргаж байжээ. 1926 онд алсын замд гарсан тэдгээр хүүхэд зөвхөн өөрсдийн ирээдүйг бүтээхээр бус, Монгол Улсынхаа ирээдүйд хэрэгтэй эрдэм мэдлэг, шинэ туршлага эзэмшихээр зорьсон юм.

Гадаад оронд суралцана гэдэг зөвхөн өөр орчинд амьдарч, шинэ хэл сурахын нэр биш. Дэлхийн мэдлэг, туршлагаас суралцаж, түүнийгээ эх орныхоо хөгжилд зориулна гэсэн хариуцлага юм.

Тэдний зарим нь эзэмшсэн мэдлэг, туршлагаа Монголдоо авчирч, боловсрол, шинжлэх ухаан, соёл урлаг болон бусад салбарын хөгжилд өөрийн мөрийг үлдээсэн. Харамсалтай нь, тэдний заримын амьдрал улс төрийн хэлмэгдүүлэлтээр таслагдаж, залуу насандаа амь насаа алдсан нь Монголын түүхийн хамгийн эмгэнэлтэй хуудсуудын нэг билээ.

Гэвч тэдний туулсан зам, хийж бүтээсэн ажил, эх орныхоо хөгжилд оруулсан хувь нэмэр мартагдах учиргүй. Түүхийг зөвхөн намтар, үйл явдлаар нь бус, тухайн үеийн хүмүүсийн үзэл санаа, хүсэл мөрөөдөл, зүтгэл хөдөлмөр, туулсан бэрхшээлтэй нь хамт ойлгож, хойч үедээ өвлүүлэх учиртай.

Боловсрол бол улс орны хөгжлийн үндэс. Эрдэм мэдлэг дэлгэрсэн цагт улс орон хөгжинө. Залуус дэлхийн мэдлэг, туршлагыг эзэмшиж, түүнийгээ эх орондоо хэрэгжүүлэх боломжтой байх нь Монголын ирээдүйд оруулж буй хамгийн үнэ цэнтэй хөрөнгө оруулалт юм.

Өнгөрсөн зууны эхэнд эх орныхоо ирээдүйн төлөө алсын замд гарсан залуусын түүх өнөөдрийн бидэнд нэг зүйлийг сануулж байна. Эрдэм мэдлэгийг эрхэмлэж, дэлхийгээс суралцаж, сурсан мэдсэнээ эх орныхоо хөгжилд зориулж чаддаг байх нь үе үеийн монголчуудын үргэлжлүүлэх ёстой эрхэм үйл хэрэг юм.