Нэн шаардлагатай эм, эмнэлгийн хэрэгслийн худалдан авалт, хангамжийг сайжруулах чиглэлд анхаарна

Өнөөдөр Эрүүл мэндийн сайд Э.Батшугар НҮБ-ын Хөгжлийн хөтөлбөрийн Монгол Улс дахь Суурин төлөөлөгч Лионель Лауренсыг хүлээн авч уулзан, эрүүл мэндийн салбарын цаашдын хамтын ажиллагааны талаар санал солилцлоо.

Уулзалтын үеэр эрүүл мэндийн даатгалын санхүүжилтийн тогтолцооны тогтвортой байдал, үр ашгийг дээшлүүлэх, иргэдэд үзүүлэх бодит өгөөжийг нэмэгдүүлэхэд чиглэсэн бодлого, шинэчлэлийн талаар ярилцав.

Эрүүл мэндийн санхүүжилтийн механизмыг боловсронгуй болгож, тэгш хүртээмжтэй, үр ашигтай, тогтвортой тогтолцоог бүрдүүлэх чиглэлээр НҮБ-ын Хөгжлийн хөтөлбөрийн техникийн дэмжлэг, мэргэжлийн зөвлөмж чухал болохыг онцолж, цаашид хамтран ажиллах хүсэлтэй байгаагаа илэрхийллээ.

Мөн энэ оны эхээр Эрүүл мэндийн яам болон НҮБ-ын Хөгжлийн хөтөлбөрийн хооронд байгуулсан Санамж бичгийн хүрээнд цус бүлэгнэлтийн VIII хүчин зүйлийн рекомбинант эмийн гурван жилийн тогтвортой хангамжийг бүрдүүлэх чиглэлээр амжилттай хамтран ажилласанд талархал илэрхийллээ. Тус эмийг хүлээн авч, хэрэглээнд нэвтрүүлсэн нь хамтын ажиллагааны бодит үр дүн юм.

Цаашид нэн шаардлагатай эм, эмнэлгийн хэрэгслийн худалдан авалт, хангамжийг сайжруулах болон харилцан сонирхсон бусад чиглэлээр хамтын ажиллагааг өргөжүүлж, иргэдэд хүрэх эрүүл мэндийн тусламж, үйлчилгээний чанар, хүртээмжийг нэмэгдүүлэхэд анхаарч ажиллахаар санал солилцов.