С.Одонтуяа: Олон давхардсан ижил төстэй хяналт шалгалтуудаас эмнэлгийн ажилтнууд залхаж байна

УИХ-ын чуулганы /2026.11.05/-ны өдрийн хуралдаанаар Эрүүл мэндийн ажилтны тухай болон хамт өргөн мэдүүлсэн хуулийн төслүүдийн хэлэлцэх эсэх хэлэлцүүлгийг явуулав.

Хэлэлцэж буй асуудалтай холбогдуулан гишүүд асуулт асууж, байр сууриа илэрхийллээ.

УИХ-ын гишүүн С.Одонтуяа: 

Эмч нарын нөхцөл үнэхээр хүнд байгаа. Эмч нарын дундаж наслалт маш бага. Т.Мөнхсайхан сайд дунд нь ажиллаж байсан хүний хувьд энэ шалтгаануудыг нь яаж засаж залруулахаар оруулсан юм. Мэдээж бүгдийг мөнгөтэй уях биш зөв менежмент бас сэтгэл байх хэрэгтэй. Ажлын ачааллын тэнцвэртэй байдлыг хангах тал дээр эмч нар дээрээ анхаарахгүй бол их хүнд байдалд орсон. 

Маш олон эмч эмнэлгийн ажилтнууд Солонгос явж байгаа, өөрийн мэргэжлээрээ биш шал өөр мэргэжлээр үнэлэмж доогуур ажил хийхээр улсад хохиролтой болчхож байна. Эмчийн үнэлэмжийг бид дээшлүүлэхгүй бол явахгүй. Үүн дээр хөдөлмөрийн хуулиас давсан шаардлагыг эмч сувилагчдаас яаж хамгаалах юм бэ? Энэ хуульд яг юу гэж орсон бэ гэдгийг асуумаар байна. 

Олон давхардсан ижил төстэй хяналт шалгалтуудаас эмнэлгийн ажилтнууд залхаж байна. Үүнийг цөөлөх тал дээр анхаарч эмч сувилагчдын энэ асуудлыг анхаарах, хамгаалах тал дээр юм орсон уу. Нэгдсэн холбоо гээд дахиад нэг том улс төрөөс хамааралтай байгууллага байгуулах гээд байна. Ийм нүсэр байгууллага байгуулах гээд байгаа шалтгаан нь юу юм бэ?