Багануур дүүргийн боловролын байгууллагуудад хичээлийн хэрэглэгдэхүүн, тоног төхөөрөмж гардууллаа

УИХ-ын гишүүн Ц.Сандаг-Очир Нийслэлийн алслагдсан дүүргүүдийн тойргоос сонгогдсон гишүүний хувьд Багануур, Налайх, Багахангай дүүргийнхээ боловсрол, эрүүл мэндийн салбарын төсөв, хөрөнгө оруулалтыг нэмэгдүүлэх, байгууллагуудын тоног төхөөрөмж, материаллаг баазыг үе шаттайгаар шинэчлэхэд анхааран ажиллаж байна.

Энэ ч утгаараа өнөөдөр /2026.11.09/ УИХ-ын гишүүн С.Амарсайханы хамт Багануур дүүрэгт ажиллаж, сургууль, цэцэрлэгүүдийн сургалтын орчин, материаллаг баазыг сайжруулахад шаардлагатай ухаалаг телевизор, зөөврийн компьютер, сургууль, цэцэрлэгийн гал тогооны тоног төхөөрөмж, сурагчийн ширээ, сандал зэрэг нийт 300 гаруй сая төгрөгийн үнэ бүхий тоног төхөөрөмжийг шийдвэрлэснээ хүлээлгэн өглөө.

Мөн энэ үеэр сургууль, цэцэрлэгийн багш, ажилтнуудын төлөөлөлтэй уулзаж, салбарт тулгамдаж буй асуудал, шийдвэрлэх шаардлагатай саналуудыг нь сонслоо.

Уулзалтаар багш, ажилтнуудын зүгээс

• Багш, ажилтнуудын нийгмийн баталгааг сайжруулах, орон сууцны хүртээмжийг нэмэгдүүлэх, ипотекийн зээлийн урьдчилгаа төлбөрийн нөхцөлийг хөнгөлөх, түрээслээд өмчлөх хөтөлбөрийг өргөжүүлэх;

• Нөхөн хангалтын зардлыг тогтмол, тасралтгүй олгох тогтолцоог бүрдүүлэх;

• Сургалтын орчин, сургууль, цэцэрлэгийн материаллаг баазыг цаашид улам сайжруулах зэрэгт анхаарч өгөхийг хүссэн юм.

"Боловсролын салбарын хөгжил бол хүүхэд бүрийн ирээдүйтэй шууд холбоотой.

Иймд багш, ажилтнуудын ажиллах орчин, нийгмийн баталгааг сайжруулахын зэрэгцээ хүүхдүүдийн сурч, хөгжих таатай орчныг бүрдүүлэх чиглэлээр бодит ажил, шийдлүүдийг үе шаттай хэрэгжүүлэхэд анхаарах болно" гэдгийг Ц.Сандаг-Очир гишүүн онцлов.