Үйл явдал2 мин унших
Ерөнхийлөгч У.Хүрэлсүх экологийн асуудлаарх бүс нутгийн дээд түвшний чуулга уулзалтын нээлтэд оролцож, үг хэллээ

Эх сурвалж:
Гадаад харилцааны яамОдоохон...
Үйл явдал2 мин унших

Эх сурвалж:
Гадаад харилцааны яамМонгол Улсын Ерөнхийлөгч У.Хүрэлсүх Бүгд Найрамдах Казахстан Улсад хийж буй төрийн айлчлалынхаа хүрээнд 4 дүгээр сарын 22-ны өдөр Экологийн асуудлаарх бүс нутгийн дээд түвшний чуулга уулзалтын нээлтийн арга хэмжээнд оролцож, үг хэллээ.

Астана хотноо болж буй Экологийн асуудлаарх бүс нутгийн дээд түвшний чуулга уулзалтад Казахстан, Монгол Улсаас гадна Азербайжан, Армени, Гүрж, Киргизстан, Тажикистан, Туркменистан, Узбекистан Улсын төр, засгийн тэргүүн нарын зэрэгцээ НҮБ, олон улсын бусад байгууллагын удирдах албан тушаалтнууд оролцож байна.

Ерөнхийлөгч У.Хүрэлсүх хэлсэн үгийнхээ эхэнд экологийн асуудлаарх бүс нутгийн дээд түвшний уулзалтыг эх орондоо хүлээн авч зохион байгуулж буй Бүгд Найрамдах Казахстан Улсын Ерөнхийлөгч Касым-Жомарт Токаевт талархал илэрхийлээд энэхүү арга хэмжээ нь уур амьсгалын өөрчлөлт, цөлжилт, усны нөөцийн хомсдол зэрэг дэлхий нийтийг хамарсан сорилтуудыг даван туулахад бүс нутгийн хамтын ажиллагааг эрчимжүүлэхэд онцгой ач холбогдолтойг цохон тэмдэглэв.
Түүнчлэн Тогтвортой хөгжлийн зорилтуудын хэрэгжилт дэлхийн хэмжээнд хангалтгүй түвшинд байгааг онцолж, энэ хүрээнд Монгол Улс дотоодын нөөц, боломжоо бүрэн дайчлан “Тэрбум мод” үндэсний хөдөлгөөнийг хэрэгжүүлж, газрын доройтлыг бууруулах, ойжуулалтыг нэмэгдүүлэх, хүнсний аюулгүй байдлыг хангах чиглэлд бодитой арга хэмжээ авч байгаа талаар танилцууллаа. Мөн манай улсын санаачилсан “Бэлчээр ба нүүдлийн мал аж ахуй эрхлэгчдийн олон улсын жил”-ийн хүрээнд мал аж ахуйн салбарын ач холбогдол, нүүдлийн соёл иргэншлийн үнэ цэнийг дэлхий нийтэд сурталчлах ажлыг идэвхтэй зохион байгуулж байгаа талаар дурдав.
Ерөнхийлөгч У.Хүрэлсүх хэлсэн үгийнхээ төгсгөлд Монгол Улс Нэгдсэн Үндэстний Байгууллагын Цөлжилттэй тэмцэх тухай конвенцын Талуудын 17 дугаар бага хурлыг “Эх байгалиа сэргээе, Итгэл найдвараа бадраая” уриан дор 2026 оны 8 дугаар сарын 17-28-ны өдрүүдэд Улаанбаатар хотноо зохион байгуулахаар бэлтгэж байгааг дурдаж, улс орнуудыг идэвхтэй оролцох, хамтран ажиллахыг уриаллаа.
Эл чуулга уулзалтын хүрээнд бүс нутгийн болон түнш улсуудын 1500 гаруй бодлого боловсруулагчид, эрдэмтэн судлаачид, бизнесийн төлөөлөл хуран цуглаж, усны нөөцийн хомсдол, мөсөн голын хайлалт, цөлжилт, агаарын бохирдол зэрэг хүрээлэн буй орчин, уур амьсгалын өөрчлөлтөд хамтран хариу үзүүлэх бүс нутгийн нэгдсэн шийдэл боловсруулах, экологийн хамтарсан бодлого, стратегийг тодорхойлох, төр, хувийн хэвшил, олон улсын байгууллагуудын хамтын ажиллагааг гүнзгийрүүлэх, ногоон технологи, тогтвортой хөрөнгө оруулалтыг дэмжих чиглэлээр чухал яриа, хэлэлцүүлгүүд өрнүүлж байна.
