УИХ-ын чуулганы /2026.05.07/-ны өдрийн хуралдаанаар “Хууль баталсантай холбогдуулан авах арга хэмжээний тухай” Улсын Их Хурлын тогтоолын төсөл /Эрхтэн, эд, эс шилжүүлэн суулгах тухай хуулийн төсөлтэй холбогдуулан боловсруулсан, анхны хэлэлцүүлгийг хэлэлцлээ.

Хэлэлцэж буй асуудалтай холбогдуулан гишүүд асуулт асууж, байр сууриа илэрхийллээ.

УИХ-ын гишүүн Б.Уянга:

Нэгдүгээрт, Тусгай сангийн зарцуулалтыг амьгүй донорын гэр бүлд олгох нэг удаагийн оршуулгын тэтгэмж гэдгийг нэмж өөрчлөн найруулан хууль дээр орж ирж байгаа. Судлаад үзлээ, ажлын хэсэг хариулаад өгөөрэй. Нийгмийн даатгалын сангаас олгох тэтгэмжийн тухай хууль гээд байна. Энэ хуулийн 8.3-д нас барсан даатгуулагчийн гэр бүлийн гишүүнд олгох тэтгэмжийн хэмжээг нийгмийн даатгалын асуудал эрхэлсэн төрийн захиргааны төв байгууллагын саналыг үндэслэн Үндэсний зөвлөл батална гэх.

2023 оны 8 сарын 2-нд Үндэсний зөвлөл 3 сая 500 мянган төгрөгийг амьгүй донор болж эс, эд эрхтнээ бусдад шилжүүлсэн даатгуулагчийн гэр бүлийн гишүүнд олгоно гээд тэтгэмжийн хэмжээг нь баталчихсан. Одоо хүчин төгөлдөр мөрдөгдөж байгаа Тэгэхээр танай хуулийг дагаж орж ирж байгаа ЗГ-ын тусгай сангийн тухай хууль батлагдвал давхардаад олгогдох юм шиг. Нэг нь нийгмийн даатгалын сангаас олгох тэтгэмжийн тухай хуулийн дагуу нөгөөдөх нь ЗГ-ын тусгай сангийн тухай хуулийн дагуу.... ингэж уншигдаад байна! Үүн дээр хариулт өгөөч ажлын хэсгийнхэн?

Хоёрдугаарт, Хуулийн төсөл дээрх найруулга нь "амьгүй донорын гэр бүлд олгох нэг удаагийн оршуулгын тэтгэмж" найруулга нь нэг өөр байна. Тухайлбал, нэг удаагийн оршуулга гэх. Хоёр удаагийн оршуулга гэж баймааргүй юм. Энэ мэт найруулга дээр нь анхаармаар байна!

Б.Уянга: Хуулийн давхардал үүсэх эрсдэл байж магадгүй харагдаж байна!