Эдийн засгийн байнгын хорооны (2026.06.09)-ний өдрийн хуралдаанаар УИХ-ын гишүүн Л.Соронзонболд нарын 13 гишүүнээс өргөн мэдүүлсэн Газрын тосны тухай хуульд өөрчлөлт оруулах тухай хуулийн төслийг үзэл баримтлалын хүрээнд хэлэлцэхийг гишүүдийн 62.5 хувь нь дэмжлээ.

Хэлэлцэж буй асуудалтай холбогдуулан УИХ-ын гишүүн Г.Уянгахишиг дараах байр суурийг илэрхийллээ.

Хуулийн төслийг хэлэлцэхийг дэмжиж байгаа. Учир нь хэлэлцэж эхэлсний дараа хуваарилалт нь яаж явах, шинэ сан бий болгох уу, баялгийн сантай уялдуулах уу гээд төсвийн зохицуулалтыг эргэж харах боломжтой гэж үзэж байна. Бидэнд тулгамдсан том асуудал байна. Яагаад хайгуулын талбай ихсэхгүй, уул уурхай явахгүй байгаа юм гэдэг. Газрын тосны хайгуулын олон талбай байгаа боловч идэвхтэй үйл ажиллагаа явахгүй, орон нутгийнхантай нүүр тулдаг.

Төсвийн ихэнх хувийг уул уурхайн бүтээгдэхүүнийг бий болгож буй ашигт малтмал бүрдүүлдэг. Хэрвээ газрын тос ашиглагдаад явбал их хөрөнгө мөнгө төсөв рүү орох ёстой. Нөлөөлөлд хамгийн их өртөж буй ард иргэдэд хуваарилагддаг мөнгө нь тодорхойгүй, том тогоо руугаа орчихоод буцаж хуваарилагддаг асуудал нь орон нутгийнхны эсэргүүцэх шалтгаан болж байгаа нь ажиглагддаг. Тиймээс орон нутагт буюу тухайн аймаг, тухайн сумд очих хувь хэмжээг ахиу тавьж өгөх зохицуулалтыг бий болгоод, эрэл хайгуулын ажлыг илүү идэвхжүүлснээр төсөвт орох дам нөлөөлөл нь сайжрах юм. Иймд хэлэлцэх эсэхийг нь дэмжээд, дараа нь зарчмын зөрөөтэй саналаар бүсийн хөгжлийн сан руу юу, эсвэл Баялгийн сан руу хуваарилах ёстой юу гэдгээ шийдвэрлэх нь зүйтэй.

Г.Уянгахишиг: Нөлөөлөлд өртөж буй орон нутагт хуваарилах АМНАТ-ын хувь хэмжээг нэмж, эрэл хайгуулын ажлыг идэвхжүүлье