УИХ-ын чуулганы /2026.07.03/-ны өдрийн хуралдаанаар Монгол Улс, Олон улсын сэргээн босголт, хөгжлийн банк хоорондын “Эрчим хүч-4” төслийн зээлийн хэлэлцээрийг соёрхон батлах тухай хуулийн төслүүдийг хэлэлцлээ.

Хэлэлцэж буй асуудлаар УИХ-ын гишүүн Л.Соронзонболд дараах тодруулгыг авч, байр сууриа илэрхийллээ.

Бид эрчим хүчний салбарын тухай их ярьдаг. Ихэнх эрчим хүчний төслүүд гадаад валютаар зээл авч хэрэгждэг. Жил ирэх тусам валютын ханшийн уналтаас хамаараад зээлийн өртөг, хүүгийн зардал нь өсчихөөр зээлийн хэмжээ маань ч өсчихдөг. Тэгэхээр энэ асуудлаа цаашид яая гэж бодож байна вэ?

1. Хэнтий аймагт цахилгааны тасалдал маш их. Нэг талаасаа Багануур бүсийн цахилгаанаар хангагдаж байгаа боловч шугам сүлжээний чанар их муу байдаг.

2. Дорнод аймгийн ДЦС-аас Сүхбаатар аймгийн Баруун-Уртаар дамжиж цахилгаан авдаг. Ийн 2 талаасаа авч байгаа цахилгаан нь дамжуулах шугам сүлжээний чанар, элэгдлээс хамаараад маш их хэлбэлздэг. Үүнийг хэрхэн шийдэх вэ?

3. Төвийн бүсээ үе шаттай шийдэж болж байна. Зүүн бүсийн Чойбалсан Баруун-Уртын чиглэлийн цахилгаан дамжуулах 200 гаруй километр 1 шугам бий. Үүнийг ЗХУ-ын Мардайн орд ашиглагдаж байх үед тавьсан. Үүний чанараас хамаараад Сүхбаатар аймгийн сумдын цахилгаан их тасардаг. Үүнийг хэзээ шийдэхээр төлөвлөж байгаа вэ?

Л.Соронзонболд: Цахилгаан дамжуулах шугам сүлжээний чанар, элэгдлээс үүдэлтэй Зүүн бүсийн аймгуудад тасалдал маш их байна!