“Герман, Франц улсад суралцсан анхны монголчууд -100 жил” эрдэм шинжилгээний хурал боллоо

Өнөөдөр /2026.10.29/ “Герман, Франц улсад суралцсан анхны монголчууд -100 жил” эрдэм шинжилгээний хурал боллоо.

Гадаад харилцааны сайд Б.Батцэцэг:

Нэгэн зууны тэртээ алс холын Герман, Франц улсыг зорьж, мэдлэг боловсрол, шинжлэх ухаан, соёлын шинэ ололтоос суралцсан 35 залуугийн түүх манай боловсрол, оюун санааны хөгжлийн нэгэн чухал хуудас билээ.

Тэд эзэмшсэн мэдлэг, хуримтлуулсан туршлагаа эх орныхоо хөгжилд зориулж, боловсрол, соёл, шинжлэх ухаан, нийгмийн хөгжилд үнэтэй хувь нэмэр оруулсан байдаг. Түүнчлэн Монгол, Герман, Францын харилцааг хүн хоорондын холбоо, хэл соёл, мэдлэг боловсролын солилцоогоор баяжуулахад өөрсдийн хувь нэмрийг оруулсан юм.

Эх орныхоо хөгжилд мэдлэг боловсрол, хөдөлмөр зүтгэлээ зориулсан эрхэм хүмүүсийн амьдрал, үйл хэргийг судлан сурталчилж, түүхэн өвийг хойч үедээ өвлүүлэн үлдээж буй эрдэмтэн судлаачид, гэр бүл, үр хүүхэд, төрөл төрөгсөд болон хурлыг зохион байгуулагчдад талархал илэрхийлье.

Түүхээ судалж, өв соёлоо дээдлэн, дэлхийн мэдлэг, туршлагаас суралцаж, түүнийгээ эх орныхоо хөгжилд зориулах үйлс үеийн үед үргэлжлэх болтугай.