М.Мандхай: Салбар дундын уялдаагүй байдал хүнс, хөдөө аж ахуйн салбарын хөгжилд том чөдөр болж байна

“Стандартын хэрэгжилт ба эрх зүйн орчин” сэдэвт хэлэлцүүлэг 3  өдөр үргэлжилж амжтлттай зохион байгуулагдсан. Тус хэлэлцүүлгийн үр дүн, цаашид хэрэгжүүлэх ажлын талаар Улсын Их Хурлын даргын 2024 оны 84 дүгээр захирамжаар байгуулагдсан Стандартын эрх зүйн орчныг шинэчлэх санал, дүгнэлт гаргах, холбогдох хууль тогтоомжийн төсөл боловсруулах үүрэг бүхий ажлын хэсгийн гишүүн, УИХ-ын гишүүн М.Мандхайгаас тодрууллаа.

Улсын Их Хурлын гишүүн М.Мандхай: Улсын хэмжээнд стандарт хангалтгүй, хүртээмжгүй байгаагаас олон эрсдэл бий болж байна. Үүний нэг нь хүнсний аюулгүй байдлын асуудал юм. Ялангуяа хөдөө, аж ахуйн үйлдвэрлэл, үйл ажиллагааг өргөжүүлэхэд стандартын асуудал чухал. Манай улсын хүнсний бүтээгдэхүүний 70 орчим хувь нь импортоор орж ирдэг. Өнөөдрийн хэлэлцүүлгийн үеэр импортоор орж ирж байгаа хүнсний бүтээгдэхүүнд 167 төрлийн шинжилгээ хийхээс 12-ыг нь гаалийн байгууллага шинжилдэг гэх асуудлыг хөндөж байна.

Мөн салбар дундын уялдаа холбоо чухал байна. Процессын хувьд жишээлбэл, импортын хүнсний худалдаалдаг дэлгүүрүүд үйл ажиллагаагаа өргөтгөснөөр дотоодын хүнс үйлдвэрлэгч байгууллагуудын бизнест сөргөөр нөлөөлдөг. Түүн дундах хүнд суртал, салбар дундын уялдаагүй байдал хүнс, хөдөө аж ахуйн салбарын хөгжилд том чөдөр болж байгаа нь харагдаж байна. Нэн яаралтай стандартыг хэрэгжүүлэх, шаардлагатай лабораториудыг өргөжүүлэх, шаардлагатай тоног төхөөрөмж болон шинжилгээний төрлүүдийг сайжруулж байж хүнсний аюулгүй байдал бүрэн хангагдах боломжтой.