Б.Жавхлан: Хөдөө аж ахуйн салбарын экпортыг нэмэгдүүлэх чиглэлээр цогц арга хэмжээ авч ажиллана

Тариалангийн тогтвортой хөгжлийн “Атрын IV аян”-г албан ёсоор нээж, Хөдөө аж ахуйн үйлдвэрлэл эрхлэгчдийн улсын зөвлөгөөн Дархан-Уул аймагт өнөөдөр /2025.03.28/ эхэллээ.

Зөвлөгөөнд Монгол Улсын Ерөнхий сайд Л.Оюун-Эрдэнэ болон УИХ, Засгийн газрын зарим гишүүд, 21 аймаг, нийслэлийн хүнс, хөдөө аж ахуй, хөнгөн үйлдвэрийн салбарын 600 гаруй төлөөлөгч оролцож байна.

"Газар тариалан, хөдөө аж ахуйн салбарын хөгжил нь дан ганц хүнсний хангамжийн асуудал биш, экспорт, бүс нутгийн хөгжил, тогтвортой амьжиргаа, нийгмийн тэнцвэрийг хангах үндэс юм. Тийм  учраас сүүлийн 10 гаруй жилээр авч үзэхэд татварын хөнгөлөлт, чөлөөлөлт, урамшуулал, дэмжлэг, хүүгийн татаас гээд нийтдээ 3 их наяд төгрөгийн дэмжлэгийг зөвхөн энэ салбарт үзүүлээд байна хэмээн Сангийн сайд Б.Жавхлан онцолж байлаа. 

Тэрбээр "Сангийн сайдын хувиар хөдөө аж ахуйн салбарт хөрөнгө, дэмжлэгийг хуваарилахдаа зорилт, үр дүнтэй нь уяж, тухайн жилийн төсвийг төлөвлөхдөө салбарын бүтээмж, өрсөлдөх чадвараа дээшлүүлэх, экспортыг нэмэгдүүлэх зорилт тавина. Цаашид Экспортыг эрчимжүүлэх, валютын нөөцийг нэмэгдүүлэх ЗГ-ын Ажлын хэсгийн ахлагчийн хувьд хөдөө аж ахуйн салбарын экпортыг нэмэгдүүлэх чиглэлээр цогц арга хэмжээ авч ажиллах болно" гэлээ.