Үйл явдал2 мин унших
С.Бямбацогт: Хүн бүрийн сэтгэлийн хоймор хүндлэл дүүрэн оршдог Багш нартаа баярын мэнд хүргэе

Одоохон...
Үйл явдал2 мин унших

БАГШИЙН ТУХАЙ БОДОЛ
Өнөөдөр багш нарын өдөр. Өрөөлийн хүүхдийн төлөө өөрийн хүүхдээ ч умартан зүтгэдэг халуун сэтгэл тэднийх.
Багш гэдэг хүнээр хүн хийх ухааныг эзэмшсэн ачтанууд. Бид жилдээ нэг л удаа багшаа дурсаж, багш нараараа бахархаж, тэд маань ч догдолж баярлаад л өнгөрдөг.
Харин багшийн ажлын байран дахь асуудал, амьдралын гүн дэх зовлонг өнгийж харахдаа хойрго.
Яахав 2024 онд хөдөө орон нутгийн багш нарын хөдөлмөрийн үнэлэмж бүсийн нэмэгдэл буюу орон нутгийн нэмэгдлийн ачаар харьцангуй сайжирсан. Харин үүнээс хамгийн их ачаалалтай ажиллаж байгаа хотын багш нар маань хамрагдалгүй хоцроод үлдчихсэн үү гэвэл тийм.
Мөн нөгөө талд бид багш бэлтгэх асуудалдаа, багшийн сургуулийн босгыг хэрхэн өндөрсгөж, басхүү тэр шалгуурыг давж багш мэргэжлээр төгсөгчдөдөө бусдаас ямар давуу тал олгож болохыг бодох, бодохоор зогсохгүй бодлого болгох цаг нэгэнт болсонтой маргахгүй.
Хуучин цагт сурлага сайтай хүүхдүүд Багшийн сургуульд сурдаг байсан нь үнэн. Сэхээтнүүдийн манлайд багш нар явдаг байсан нь ч үнэн түүх. Тэрийгээ дагаад боловсролын чанар ч муугүй байж.
Гэтэл одоо олигтой хэдэн багшийг хувийн сургуулиуд өндөр цалин хангамжаар зодоод улсын сургуулиас урвуулах болсон нь нууц биш.
Тэгэхээр бид нэг талдаа багш нарынхаа нийгмийн асуудал, цалин хөлс, хөдөлмөрийн үнэлэмжид анхаарахын сацуу нөгөө талдаа чансаатай сайн хүүхдүүд багш болохоор тэмүүлдэг хөшүүргийг хамт хийж байж боловсролын салбараа босгох асуудлаа углуургаар нь шийднэ.
Төрд нүүрлээд байсан хулгай луйврыг хумиж цэгцэлж байж багш эмчийнхээ цалинг нэмэх боломжоо бодит болгоно.
Түүний тулд багш нараа сонсож , асуудлыг шийдэх шийдлийн эрэлд хамт гарцгаая.
Хүн бүрийн сэтгэлийн хоймор хүндлэл дүүрэн оршдог Багш нартаа баярын мэнд хүргэе