#Коммент2 мин унших
Х.Нямбаатар: Шинэ түлшний угаарын хийн агууламж нүүрстэй харьцуулахад 80 хувиар бага

Сэтгүүлч Б.Цэцэгсүрэн
Одоохон...
#Коммент2 мин унших

Сэтгүүлч Б.Цэцэгсүрэн
Монгол Улс нүүрсний орон атал түлшээ урд хөршөөс авч “мөнгө угаах нь” гэдэг хардлага нийгмийн сүлжээнд тархсан. Хотын дарга Х.Нямбаатар “Шинэ төрлийн түлшийг боловсруулах боломж манайд одоогоор байхгүй учраас ирэх жил хагас коксон нүүрсний үйлдвэр ашиглалтад ортол шинэ түлшийг БНХАУ-аас оруулж ирж, иргэдийн эрүүл мэнд, амь насанд халгүй байх нөхцөлийг бүрдүүлэхээс аргагүй” хэмээн цэг тавьж ажлаа эхлүүлсэн.
2025 оны эхээр Монгол орон даяар Утааны сонсголыг үе шаттайгаар зохион байгуулсан. Үр дүнд нь Агаарын бохирдлыг бууруулах үндэсний хорооноос түлшний орц найрлагад асуудал байгааг илрүүлж, хагас коксон нүүрс хэрэглэх шаардлагатай гэсэн дүгнэлтийг Нийслэлээс ажил хэрэг болгосон байдаг.
Түүнчлэн 23 агуулахад "ШИНЭ ТҮЛШ", сайжруулсан түлшний 35 мянган тонн нөөц бүрдүүлээд байна.
Сайжруулсан шахмал түлшний тухайд хуучин үнээрээ буюу 3750 төгрөг, 25 кг шуудайтай "ШИНЭ ТҮЛШ" 5000 төгрөгөөр борлуулагдаж байна.
Иргэд өөрсдийн сонголтоор дээрх хоёр түлшээс сонгон худалдан авах боломжтой.
"ШИНЭ ТҮЛШ"-ийг түүхий нүүрстэй харьцуулахад угаарын хийн агууламж 80 орчим хувиар бага. Сайжруулсан шахмал түлштэй харьцуулахад 40-45 хувиар бага байгаа.
Нийслэл Улаанбаатар хот жилдээ 500 мянган тонн мидлинг хэрэглэж өвөлждөг байсан бол Хагас коксон "ШИНЭ ТҮЛШ" хэрэглэж эхэлснээр 300 мянган тонн хэрэглэнэ гэсэн тооцоо хийгджээ.

Хотын дарга Х.Нямбаатар шинэ түлшийг хэрэглээнд нэвтрүүлж эхэлсэн холбогдуулан БЗД-ийн өрхүүдээр орж нөхцөл байдалтай танилцсан юм. Энэ үеэр “Шинэ түлш хэрэглэснээр өмнө нь хоёр шуудай нүүрс хэрэглэдэг байсан хугацаанд нэг шуудайг хэрэглэнэ гэсэн үг. Ингэснээр айл өрхүүд зардлаа хэмнэнэ. Өөрөөр хэлбэл, огцом хүйтрээгүй үед хоногт нэг шуудай сайжруулсан түлш хэрэглэдэг байсан айл хагас шуудай хагас коксон түлш хэрэглэнэ.
Энэ түлшийг одоохондоо бид үйлдвэрлэхгүй байгаа. Ирэх жил нийслэл, Эрдэнэс Монгол ХХК-тай хамтран Багануурын уурхайгаа түшиглэж хагас коксон түлшний үйлдвэр барихаар төлөвлөж байна. Ингэснээр өндөр чанартай нүүрсийг гаднын улсаас авалгүйгээр дотоодын хэрэглээгээ хангах боломжтой болно. Цаашлаад ганц нийслэл бус бусад суурин газрыг хагас коксон түлшээр хангах төлөвлөгөөтэй ажиллаж байна.” гэлээ.

