Глобал сангийн Сүрьеэ/ДОХ-ын төслийн дэмжлэгтэйгээр 1.5 тэрбум төгрөгийн үнэ бүхий сүрьеэ өвчнийг оношлох, эмэнд тэсвэржилтийг богино хугацаанд тодорхойлох боломжтой молекул биологид суурилсан ЖенЭксперт (GeneXpert) төхөөрөмж, сүрьеэг оношлох хиймэл оюун ухаанд суурилсан зөөврийн дижитал рентген аппаратыг сумын эрүүл мэндийн төв, хөдөөгийн нэгдсэн эмнэлэг болон дүүргийн нэгдсэн эмнэлгүүдэд хүлээлгэн өглөө.

Энэ нь Эрүүл мэндийн сайдын А/319 дугаар тушаалаар 2025 оны 08 дугаар сард батлагдсан “СҮРЬЕЭТЭЙ ТЭМЦЭХ, СЭРГИЙЛЭХ, ХЯНАХ АРГА ХЭМЖЭЭНИЙ ТӨЛӨВЛӨГӨӨ”-нд тусгагдсан чухал ажлын нэг. Түүнчлэн энэ нь эрүүл мэндийн тусламж үйлчилгээний анхан шатанд сүрьеэгийн оношилгоо, эмчилгээний чадавхыг нэмэгдүүлж, өргөжүүлэх арга хэмжээ юм. Сүрьеэ өвчнийг оношлох, эмэнд тэсвэржилтийг богино хугацаанд тодорхойлох боломжтой молекул биологид суурилсан ЖенЭксперт (GeneXpert) шинжилгээг алслагдсан сумын эрүүл мэндийн төвүүдэд нэвтрүүллээ.

Тухайлбал, Хөвсгөл аймгийн Ханх сум төвөөсөө 1000 гаруй км зайтай. Урьд нь сүрьеэгийн шинжилгээний сорьцыг төв рүү тээвэрлэхэд багадаа 7 хоног болдог байсан. Одоо сумандаа шинжилгээгээ хийх боломжтой боллоо.

Харин Увс аймгийн Зүүнговь сумын хувьд зундаа +50, өвөлдөө -50 хэм хүрдэг хамгийн хүйтэн сум. Сорьц зөөвөрлөхөд нэлээдгүй бэрхшээлтэй. ЖенЭксперт шинжилгээг нэвтрүүлснээр зэргэлдээ Малчин, Тэс, Хяргас, Баруунтуруун сумын иргэд энэ сумын төвд шинжилгээ хийлгэх боломж бүрдлээ.

Мөн Багахангай дүүргийн хувьд 2010 оноос хойш өвчлөл нэлээдгүй нэмэгдсэн. Одоо оношилгоо шинжилгээ сайжирснаар өвчлөл харьцангуй багасаж байгаа сайн мэдээ байна.

Тус оношилгооны төхөөрөмж дээр ажиллах эрүүл мэндийн байгууллагын лабораторийн мэргэжилтнүүдийг ХӨСҮТ-д практик дадлага сургалтад хамруулав.

Дээрх тоног төхөөрөмжүүдийг орон нутагт тэр дундаа алслагдсан сумын эрүүл мэндийн төвүүдэд нэвтрүүлснээр сүрьеэгийн оношилгооны чадавх, хүртээмжийг нэмэгдүүлж, төвлөрлийг сааруулах юм.

Сүрьеэ өвчнийг богино хугацаанд оношлох “ЖЕНЕЭКСПЕРТ” шинжилгээг нэвтрүүллээ