УИХ-ын чуулганы /2025.12.11/-ний өдрийн хуралдаанаар Монгол Улс болон Евразийн эдийн засгийн холбоо, түүний гишүүн орнууд хоорондын худалдааны түр хэлэлцээрийг соёрхон батлах тухай хуулийн төслийг хэлэлцлээ.

Хэлэлцэж буй асуудалтай холбогдуулан гишүүд үг хэлэв.

УИХ-ын гишүүн Ж.Золжаргал:

Миний ойлгож байгаагаар худалдааны эдийн засгийн ашгаас гадна худалдааны олон улсын харилцагчдын тоог нэмэгдүүлэх ийм бодлогын шийдэл байна. Ж.Энхбаяр сайд бас хэлнэ лээ. Бодлого юм бол Монголоос гаргаж байгаа масс бүтээгдэхүүнийг хэдий өндөр эрсдэлтэй ч бодлогын шийдвэр гаргаж байгаа утгаараа "бодлогоор та бүхэн аваач ээ" гэдэг асуудлыг тавимаар байгаа юм.

Монголын масс бүтээгдэхүүнүүд юу байх вэ? Бид байгалийн эрдэс чулуу ихтэй, цементийн үйлдвэрлэл, базальт, циолид, ийм эрдсээс үйлдвэрлэсэн бүтээгдэхүүн, яваандаа тэгээд төмрийн бэлдэц гэх мэт. Эдгээр нь маш өндөр өрсөлдөх чадвартай, өртөг багатай, өндөр чанартай евро стандарттай. Эдгээрийг хойш нь гаргах гэхээр лабораторийн, хил гаалийн процедур яриад ерөөсөө болдоггүй.

Хүнд суртлын, техник стандартын юм шиг шалтгаанаар хориг тавиад байдаг гэж хардаг. Эдийн засаг, хөгжлийн яам, хариуцсан хүмүүс энэ тал дээр бодлого гаргаж хамтарч ажиллаж байгаа бол процедурыг нь судал аа!

ОХУ Беларус, Казахстанаас цемент аваад Сибирь лүү зөөснөөр өнгөрсөн жил цементийн хэрэглээ нь нэлээн өндөр өссөн юм байна.Тэгэхээр энэ бүс нутагт нь, хажууд нь байгаа тул Монголын бүтээгдэхүүнүүдийг оруул гэдэг асуудлыг тавимаар байгаа юм. Ингэж байж бодлогын хувьд жинхэнээсээ хэрэгжих байх.

Тэгэхээр ийм масс материал, барилгын материал, эрдэс чулуулгийн хийц, төмөрлөг, хар төмөрлөгийг экспортлохдоо өөрсдийгөө голох хэрэггүй. Суурь нь бий болчихсон, хүчин чадал нь илүүдчихсэн, цаашдаа ч нэмэгдэнэ. Технологи нь өндөр, өртөг нь бага. Оростой хамтарсан төмөр замтай.

Бодлогоор хамтрах гээд байгаа бол үүнийг зөрүүлж оруулах, масс экспорт хийх нь манай үндсэн чиглэл байна. Гурван жилд энэ ажил хийгдэхгүй бол цаашаа үргэлжлүүлэх нь ач холбогдолгүй. Зөвхөн жижиг дунд, хөнгөн үйлдвэрлэл, хүнсээр бол манай талд хүртэх ашиг урт хугацаандаа тийм өндөр биш!

Ж.Золжаргал: Зөвхөн хөнгөн үйлдвэрлэл, хүнсээр Евроазитай хамтарвал урт хугацаандаа хүртэх ашиг өндөр биш!