#Тойрог2 мин унших
Булган аймгийн Гурванбулаг сумаас гурван үе дамжсан “улсын аварга” малчин тодорлоо

Одоохон...
#Тойрог2 мин унших

“Сүрээр дарагч” хэмээх гал морин жилийн босгон дээр Хойд бүс буюу Булган, Хөвсгөл, Орхон аймгаас “Улсын хошой аварга малчин” нэг, “Улсын аварга малчин” 19 төрөн гарлаа. Тэр дундаа анхдагчдын өлгий, адуун сүргийн манлай Булган нутгаас нийт зургаан “Улсын Аварга малчин” төрөн гарсны нэг нь Булган аймгийн Гурванбулаг сумын Агьт багийн малчин Бадарчийн Эрдэнэбилэг болж байна.

Өнөөдөр түүний удам дамжсан өвөлжөөнд “Улсын аварга” малчны цол тэмдэг, тууз, цомыг гардуулан өглөө. Ингэснээр Гурванбулаг сумаас төрсөн 20 дахь “Улсын аварга” болсон юм.
Шинэхэн аварга Б.Эрдэнэбилэг болон түүний гэргий П.Энхтуяа нар 35 жилийн турш мал аж ахуйн салбарт хөдөлмөрлөж байна. Тэрээр эцэг эхээс хөрөнгө болгон өгсөн 100 толгой мал сүргээ үр төлөөр нь өсгөн үржүүлж 2008 онд МЯНГАТ малчин болсон амжилтаа өнөөг хүртэл хадгалж, малыг удам гарвал, ашиг шим, бие бялдраар нь шилэн сонгох болон малыг эмчлэх ардын уламжлалт аргыг бүрэн эзэмшсэн, төл малыг бойжуулахдаа хашихгүй задгай аргаар бойжуулдаг, отор нүүдлийг тогтмол хийж, малын тарга хүчийг жигд сайн авахуулдаг удам дамжсан малч ухаантай тэргүүний малчин гэр бүлийн нэг юм.

Тэрээр энэхүү арга ухааныг ааваасаа өвлөн авсан бөгөөд түүний эмээ болон аав нь нутаг усандаа хүндлэгдсэн “УЛСЫН АВАРГА” малчид байжээ. Ийнхүү Гурванбулаг сумаас гурван үе дамжсан “Улсын аварга малчин” төрөн гарсан түүхэн үйл явдал боллоо.

Нутаг усныхаа нэрийг өндөрт өргөж, малч ухаан, нүүдэлчин өв соёлоо тээн, түгээн дэлгэрүүлж буй Б.Эрдэнэбилэг таны буянт сүргийн үржил шим арвижин дэлгэрэх болтугай!