УИХ-ын чуулганы /2026.05.28/-ны өдрийн хуралдаан болллоо. Хуралдаанаар “Улсын төсвийн хөрөнгө оруулалтаар төсөл, арга хэмжээг санхүүжүүлэх талаар авч хэрэгжүүлэх зарим арга хэмжээний тухай” Улсын Их Хурлын тогтоолын төслийг хэлэлцлээ.

Хэлэлцэж буй асуудалтай холбогдуулан гишүүд асуулт асууж, байр сууриа илэрхийллээ.

УИХ-ын гишүүн Ц.Туваан:

Нэгдүгээрт, Энэ маш чухал тогтоол. Тараагдсан материал дотор хэдэн тоо байна. Сүүлийн 3 жилийн хугацаанд 1,9 их наяд гэх. Энэ ер нь ямар хэмжээний мөнгө юм. Ойролцоогоор 4 тэрбум төгрөгөөр цэцэрлэг, сургууль, соёлын төв гэх мэт тооцвол 500 барилга объект, барьчих хэмжээний мөнгө. Эд нар чинь өмнө нь улсын төсөв дээр суучихсан юмнууд дээр нэмэгдээд тодотголоор орчхоор энэ их мөнгө шинэ рүү биш хуучин юм дээр нэмэгдээд алга болчхоод байна! Улаанбаатар хотын машины түгжрэл шиг л ар араасаа солигдох, шинээр бариулах байшингуудын очер дарааллын түгжрэл үүсчхээд байна. Сая орон нутгаар явахад сургууль, цэцэрлэг, эмнэлэг, соёлын, төв, тамгын газар гэх мэт сум бүрт 40-өөс дээш жилийн насжилттай барилгууд маш их байна. Сольё, их засвар хийе гэдэг асуудлууд ярьж байгаа. Магадлангаар ороод дотор нь үйл ажиллагаа явуулах боломжгүй болчихсон газрууд маш их байна. Тэгээд Үүнийг шийдэх гэхээр гацаанууд чинь тээг болчхоод хамаг хөрөнгө оруулалтын мөнгө нь гуравхан жилд 1,9 их наядаар өмнө нь төсөвлөгдсөн мөнгө рүү ороод алга болчхоод байна! Энэ асуудлын гацааг нь гаргаж, яаралтай шийдэх хэрэгтэй байна.

Хоёрдугаарт, Сэлэнгэ аймгийн Шаамар сумын Дулаанхаан тосгон буюу 3 дугаар баг дээр 420 сая төгрөгөөр баригдаад гүйцээгүй ариун цэврийн байгууламж байна гэвэл та нар итгэх үү! Яахав анхны зориулалт нь халуун усны зориулалтаар баригдаж байгаад гүйцэлгүй зогсоод "00" болоод хувирчихсан. Үүн дээр Барилгын яамнаас хүн байвал хариулт өгнө үү?

Гуравдугаарт, Төв аймгийн Мөнгөнморьтын замын асуудал 7-8 жил болж байна. Төсөв мөнгөө бүгдийг нь авчихсан. Гэтэл зам нь тавигддаггүй байх жишээний.

Дөрөвдүгээрт, ахмадын өргөөг хамгийн сүүлд хаана барьсан бэ? Төсөв дээр тавигдсан уу?