Байгаль орчин, уур амьсгалын өөрчлөлтийн яамнаас аймаг, нийслэл, сум, дүүргийн байгаль орчны хяналтын улсын байцаагчид, байгаль хамгаалагчид болон Экологийн цагдаагийн албатай хамтран Байгаль орчны салбарын нэгдсэн зөвлөгөөнийг өнөөдөр зохион байгууллаа.

Зөвлөгөөний үеэр байгаль орчныг хамгаалах, экологийн тэнцвэрт байдлыг хангах чиглэлээр үр бүтээлтэй ажиллаж, салбарын хөгжилд үнэтэй хувь нэмэр оруулсан албан хаагчдын хөдөлмөр, зүтгэлийг үнэлэн төрийн болон салбарын шагнал гардууллаа.

БОУАӨ-ийн сайд Ц.Сандаг-Очир зөвлөгөөнийг нээж хэлсэн үгэндээ: "Энэхүү зөвлөгөөн нь байгаль орчны салбарын өнгөрсөн хугацаанд хийж хэрэгжүүлсэн ажлын тайлан, өнөөгийн нөхцөл байдал, тулгамдсан асуудал, цаашид бодлогын хэмжээнд болон хууль эрх зүйн хүрээнд хийж хэрэгжүүлэх ажлаа хэлэлцэх чухал арга хэмжээ болж байна. Манай улсын газар нутгийн ихэнх хэсэгт цөлжилт, газрын доройтол нэмэгдэж, усны нөөцийн хүртээмж муудаж, уул уурхайн ашиглалт эрчимжиж, уур амьсгалын өөрчлөлтийн нөлөө улам бүр нэмэгдэж байгаа энэ цаг үед байгаль орчны хяналтын асуудал үндэсний хэмжээний чухал асуудал болоод байна" хэмээн онцоллоо.

Тэрбээр мөн Монгол Улсын Үндэсний аюулгүй байдлын тухай хуульд байгаль орчныг хамгаалах үйл ажиллагааг үндэсний аюулгүй байдлыг хангах тусгайлсан чиг үүргийн нэг гэж тодорхойлсон байдгийг дурдаад, "Байгаль орчны хяналт нь зөвхөн шалгалт хийдэг байгууллагын ажил биш. Энэ бол төрөөс баталсан хууль тогтоомж, бодлого, хөтөлбөрүүд газар дээрээ бодитой хэрэгжиж байгаа эсэхийг үнэлдэг төрийн засаглалын үндсэн механизм юм" гэдгийг онцлон тэмдэглэлээ.

Энэ үеэр Монгол Улсын Ерөнхийлөгчийн зарлигаар байгаль орчны салбарт олон жил үр бүтээлтэй ажиллаж, эх орныхоо байгаль хамгааллын үйл хэрэгт үнэтэй хувь нэмэр оруулсан албан хаагчдад төрийн дээд одон, медаль гардуулсан юм.

Мөн Байгаль орчин, уур амьсгалын өөрчлөлтийн салбарын шагнал болох “Байгаль орчны тэргүүний ажилтан” тэмдгээр Г.Нэмэхбуян, Н.Жаргалсайхан, С.Ганзоригт, Б.Сайнбуян, Б.Уянга, Л.Энхмөрөн, Г.Лхам, Р.Отгонбаяр, И.Төрмөнх, М.Галбадрах, Д.Цэрэннадмид, Б.Отгонсүрэн нарыг шагнаж урамшууллаа.

Салбарын “Жуух бичиг”-ээр А.Сумъяагарав, Ж.Батхүү, Б.Батчулуун, О.Должин, Б.Ганболд, Д.Мөнхтулга, Г.Даваацэрэн, О.Анхтөмөр, А.Амартүвшин нарыг шагнав.

Түүнчлэн Цагдаагийн ерөнхий газрын даргын тушаалаар байгаль орчныг хамгаалах, экологийн тэнцвэрт байдлыг хангах үйл хэрэгт идэвх санаачилгатай ажилласан Д.Бат-Эрдэнэ, А.Ганболд, Д.Ганбат, С.Содов, Б.Алтантүлхүүр, С.Жаргалмаа, С.Отгонболд нарыг “Хүндэт жуух бичиг”-ээр шагнасан юм.

Зөвлөгөөний хүрээнд байгаль хамгаалагч, улсын байцаагчдын үйл ажиллагаа, хууль эрх зүйн орчин, бодлого, хэрэгжилт, тулгамдсан асуудал, байгууллага хоорондын хамтын ажиллагааны чиглэл, байгаль хамгаалагчдын нийгмийн баталгааны өнөөгийн байдал, түүнийг сайжруулах боломж зэрэг сэдвээр илтгэл хэлэлцүүлж, санал солилцлоо.

Байгаль орчны салбарын нэгдсэн зөвлөгөөн боллоо