Монгол Улсын Засгийн газраас өргөн барьсан 2026 оны улсын төсвийн тодотголыг УИХ хэлэлцэн баталлаа. Төр зардлаа 1,4 их наяд төгрөгөөр танасан тодотгол боллоо. Хэмнэсэн зардлаа иргэндээ зориулж өрхийн орлогыг хамгаалахын төлөө хүнээ бодсон тодотгол батлагдлаа гэж Ерөнхий сайд Н.Учрал онцоллоо.

2026 оны улсын төсвийн тодотголын онцлох шийдвэр :

НЭГ

435 мянган ахмад настанд суурь тэтгэвэр 196,3 тэрбум төгрөгийг төсөвлөлөө. 435 мянган ахмад настан 11 дүгээр сарын 1-нээс шинээр суурь тэтгэвэр авч эхэлнэ . Энэ бол анх удаа ахмад настны амьдралын баталгаа болгон нэвтрүүлж байгаа шинэ төрлийн тэтгэвэр нийгмийн даатгалын хуулийн шинэчлэл хэрэгжилт юм. Тэтгэвэр авагч бүр сар бүхэн 100-300 мянган төгрөгийн суурь тэтгэврийг олгоно. Өнөөдөр АРВАН ахмад настны ДОЛОО нь 769 мянга буюу доод хэмжээгээр тэтгэвэр авч байна.

ХОЁР

Хөгжлийн бэрхшээлтэй иргэн тэдний асран хамгаалагчдад 29,7 тэрбум төгрөгийг төсөвлөлөө. Хөгжлийн бэрхшээлтэй иргэний нийгмийн халамжийн тэтгэвэр 11 дүгээр сарын 1-нээс 26 хувиар нэмлээ. Сард 600 мянган төгрөг боллоо. Асаргааны тэтгэмжийг 12%-аар нэмж, 370 мянган төгрөг болголоо. Давхардсан тоогоор 171,4 мянган хүн хамрагдана. 11,12 дугаар сард 29,7 тэрбум төгрөгийг нэмж зарцуулна.

ГУРАВ

Эмч төрийн үйлчилгээний албан хаагчдын цалинд 170,1 тэрбум төгрөг, багш ажилтны цалинг санхүүжүүлэхэд 674,5 тэрбум төгрөгийг төсөвлөлөө. Боловсрол, эрүүл мэнд, шинжлэх ухаан, төрийн үйлчилгээний салбарынхан өмнө нь өөр хоорондоо ялгаатай нэмэгдсэн цалинг жигд 50% байлгахад 170,1 тэрбум төгрөг төсвийн тодотголоор хуульчлан батлагдлаа. Боловсролын салбарын 93,5 мянган багш ажилтны нэмэгдсэн цалинг бүтэн жилээр нь олгоход дутагдаж байсан 674,5 тэрбум төгрөгийг шийдэж чадлаа. Нэмэгдсэн цалингаас нь нэмэгдэл хөлсийг тооцох нэгдсэн системд ийнхүү бүрэн шилжлээ.

ДӨРӨВ

Мах, гурил, ногоо, шатахууны нөөцөд 140,9 тэрбум төгрөгийг төсөвлөлөө. Ирэх онд анх удаа 20 мянган тонн мах,12 мянган тонн ногоо, 100 мянган тонн улаан буудайг нөөцлөх болно. 3 сарын шатахуунаа хадгалах савтай болно.

ТАВ

Эрчим хүчний үнийн өсөлтийг өрхөд үүрүүлэхгүй байх болон засвар шинэчлэлчид зориулж 186,2 тэрбум төгрөгийг төсөвлөлөө. Импортын цахилгаан үйлдвэрлэлийн үнэ тарифын өсөлтийг өрхөд оногдуулахгүй байхад 107,3 тэрбум төгрөгийн татаасыг олгоно. Цахилгаан станц, дамжуулах, түгээх сүлжээ, тоног төхөөрөмжийн засвар шинэчлэлт нийтдээ 78,9 тэрбум төгрөгийг хуваарилж Их хурлаар батлууллаа. Энэ бүхэн бол өвлийн оргил ачааллын үед системийн найдвартай ажиллагааг хангахад зориулагдаж байгаа.

ЗУРГАА

ТӨК-удын ноогдол ашгаас 1,6. Их наяд төгрөгийг төсөвт төвлөрүүлж цалин тэтгэвэр, тэтгэмжээ нэмэх зэргээр иргэндээ зориуллаа. ТӨК-удын тээвэр. Шатахуун, тавилга, хогшил, машин тэрэг, гадаад, дотоод томилолт зар сурталчилгаа, зөвлөх үйлчилгээ сургалт зэрэг зардлыг бүгдийг нь хязгаарлалаа. Урсгал болон хөрөнгийн зардлаас 1,4 их наяд төгрөгийн эх үүсвэрийг чөлөөллөө.

Энэхүү төсвийн тодотгол батлагдсан өдрөөсөө эхлэн хүчин төгөлдөр мөрдөгдөж эхэлнэ.

2026 оны төсвийн тодотголоор 435 мянган ахмад настан ИРЭХ САРААС шинээр суурь тэтгэвэр авч эхэлнэ