Төсвийн тодотголоор иргэдийн орлого, амьжиргааг дэмжих, нийгмийн хамгааллыг сайжруулах, хүнс, шатахуун, эрчим хүчний хангамжийг тогтвортой байлгахад чиглэсэн дараах 6 шийдвэрийг тусгалаа.

Онцлох 6 шийдвэр:

1. Ахмад настнуудын суурь тэтгэвэр, 196.3 тэрбум ₮. 11-р сарын 1-нээс 435 мянган ахмад настан сар бүр 100–300 мянган төгрөгийн суурь тэтгэвэр авч эхэлнэ. Олон жил, өндөр шимтгэл төлсөн нь илүү тэтгэвэр авдаг шударга тогтолцоонд шилжинэ.

2. Хөгжлийн бэрхшээлтэй иргэд, асран хамгаалагчдад 29.7 тэрбум ₮. Халамжийн тэтгэвэр 26%-иар нэмэгдэж 600 мянган төгрөг, асаргааны тэтгэмж 12%-иар нэмэгдэж 370 мянган төгрөг болно. Давхардсан тоогоор 171.4 мянган иргэн хамрагдана.

3. Багш, эмч, төрийн үйлчилгээний албан хаагчдын цалинд 844.6 тэрбум ₮. Багш, боловсролын салбарын ажилтнуудын нэмэгдсэн цалинг бүтэн жилээр нь олгоход дутагдаж байсан 674.5 тэрбум төгрөгийг баталлаа. Эмч, төрийн үйлчилгээний албан хаагчдын цалинд 170.1 тэрбум төгрөг зарцуулна.

4. Хүнс, шатахууны стратегийн нөөцөд 140.9 тэрбум ₮. 20 мянган тонн мах, 12 мянган тонн хүнсний ногоо, 100 мянган тонн улаанбуудай нөөцөлж, гурван сарын шатахуун хадгалах хүчин чадал бүрдүүлнэ.

5. Цахилгааны үнийг нэмэхгүй, 186.2 тэрбум ₮. Үнийн өсөлтийг өрхөд үүрүүлэхгүйн тулд 107.3 тэрбум, цахилгаан станц, шугам сүлжээ, тоног төхөөрөмжийн засвар шинэчлэлд 78.9 тэрбум төгрөг зарцуулж, өвлийн оргил ачааллын үеийн найдвартай ажиллагааг хангана.

6. Шатахууны импортын татварын түр хөнгөлөлтийг үргэлжлүүлнэ. Хил нэвтрүүлэх, тээвэрлэх, хадгалах хүчин чадлыг нэмэгдүүлж, шатахууны хомсдол, үнийн огцом өсөлтөөс сэргийлнэ.

Нэгдсэн төсвийн тэнцвэржүүлсэн орлого 31.9 их наяд, зарлага 33.9 их наяд төгрөг болж, зарлага 971.6 тэрбум төгрөгөөр нэмэгдлээ.

ТАНИЛЦ: Төсвийн тодотголоос Онцлох 6 шийдвэр