У.Хүрэлсүх энэ сарын 25-ны өдрийн Морин цагт Ерөнхийлөгчийн тангарагаа өргөнө

УИХ-ын чуулганы өнөөдрийн /2021.06.11/ нэгдсэн хуралдаанаар “Монгол Улсын Ерөнхийлөгчийн тангараг өргөх тов тогтоох тухай” Улсын Их Хурлын тогтоолын төслийг хэлэлцэн баталлаа. 

Тогтоолын төслийг Төрийн байгуулалтын байнгын хорооны хуралдаанаар хэлэлцсэн талаарх дүгнэлтийг тус байнгын хорооны дарга Ж.Мөнхбат танилцууллаа.

Тогтоолын төсөлтэй холбогдуулан байнгын хорооны дүгнэлттэй холбоотойгоор асуулт асууж, санал хэлэх гишүүн байгаагүй тул төслийг батлах санал хураалт явуулахад нийт гишүүдийн 77% нь дэмжиж, тогтоолын төсөл батлагдсан юм.

Ингэснээр Монгол Улсын Ерөнхийлөгчийн 2021 оны ээлжит сонгуулийн үр дүнд сонгогдсон У.Хүрэлсүх 2021 оны 06 дугаар сарын 25-ны өдөр 11 цаг 45 минутанд Монгол Улсын Ерөнхийлөгчийн тангарагаа өргөхөөр боллоо.