Орон сууцны залилан газар авч, яаралтай цэгцлэхгүй бол хохирч буй иргэдийн тоо өдрөөс өдөрт өсөн нэмэгдсээр. Практик дээр энэ үйлдлийг гэмт хэргийн үндэслэлгүй гэж үзэн хаадаг аж. Эрүүгийн шугамаар хохирсон иргэд иргэний шүүхэд хандахаас өөр замгүй болдог. Ийн асуудал сунжирсаар хэдэн жил дамнах нь ч бий.

Нэг байрыг 3-4 хүнтэй гэрээ байгуулж, худалдаалчихаад алга болдог залилангийн гэмт хэргийн дуудлага ихэссэн талаар ЦЕГ-аас мэдээлж байна. Иймд иргэд орон сууц захиалах, худалдан авахдаа тухайн байрны гэрчилгээ хэний нэр дээр байгаа, тухайн гэрээлэгч өмчлөх эрхтэй эсэх, гэрээ нотариатаар баталгаажсан үгүйг сайтар шалгахыг цагдаагийн байгууллагаас онцгойлон сэрэмжлүүлсээр байна.

Гэвч гэмт хэргийн арга барил улам нарийсаж буй энэ үед уг асуудлыг эрх зүйн хүрээнд шийдэх, төрийн байгууллагуудын ажлын уялдаа холбоог сайжруулж хяналт, хариуцлагыг чангатгах, нээлттэй мэдээллийн тогтолцоог төгөлдөржүүлэх зэрэг зохицуулалтыг цаг алдалгүй хэрэгжүүлж, ирээдүйд олон хүнийг эд хөрөнгө, цаг, сэтгэл зүйгээр хохирохоос хамгаалах шаардлагатай байгаа тул УИХ-ын Өргөдлийн байнгын хорооноос “ОРОН СУУЦ ЗАХИАЛАХ, ХУДАЛДАН АВАХ ХАРИЛЦААГ ЗОХИЦУУЛЖ БАЙГАА ХУУЛЬ ТОГТООМЖИЙН БИЕЛЭЛТ”-ийн талаар мэдээлэл сонсох уулзалтыг зохион байгуулав.

Үр дүн нь цаашид хэрхэх ГАРЦ, ШИЙДЛИЙГ ТОДОРХОЙЛЖ, ХЭРЭГЖҮҮЛЭХЭД оршино.

УИХ-ын гишүүн, Өргөдлийн байнгын хорооны дарга О.Номинчимэг:

Өнгөрсөн долдугаар сараас хойш нийтдээ 32 гомдол буюу үүний цаана олон мянган хүний олон зуун тэрбум төгрөгөөрөө хохирсон, залилуулсан, сэтгэл зүйн гүн дарамтад орсон ноцтой хэргүүд байна. Бүх оролцоотой талууд хийж байгаа ажлаа танилцуулж, давхардал, хийдэл гарахгүйн тулд ажлаа уялдуулах нэгдсэн шийдэл, ойлголтод хүрэх нь хамгийн чухал. Хаана хийдэл, хяналтын механизмын сул орон зай гараад байгаа, ямар асуудал дээр зохицуулалт шаардлагатай байгаа, ямар шийдэл нь илүү хөрсөндөө буух гээд олон талаас нь бид ярилцаад тодорхой гарц, шийдэлд хүрээд байна.

Яаж?

Барилга эхлэх үеэс орон сууц, талбай бүр тодорхой дугаар, байршилтай байх,
Хаягжилтыг тодорхой болгох,
Улсын бүртгэлийн мэдээллийн санд бүртгэх,
Хөндлөнгийн хяналтын этгээдийн үүрэг оролцоо, дуусаагүй барилгын бүртгэл үнэн зөв нийтэд ил тод байх,
Орон сууц худалдан авагч иргэдийн өмчлөх эрхийн баталгаа бодитоор хангагдах эрх зүйн орчин бүрдүүлэх,
Хэрэглэгчийн эрхийг хамгаалах зохицуулалт, төрийн байгууллагуудын тус тусдаа байгаа мэдээллийн санг нэгтгэх,
Олон улсад туршигдаж үр дүнгээ өгч байгаа аргачлалыг хэрэгжүүлэх санал, санаачилга гарлаа.

Эдгээрийг боловсруулж, цаашид хэрхэх арга замуудыг тодорхойлсноор дараагийн алхамууд хийгдэх юм.

Өргөдлийн байнгын хороо иргэдийг орон сууцны залилангаас хамгаалах гарц, шийдлийг хэлэлцэв