БНХАУ-аас Монгол Улсад суугаа Элчин сайд хатагтай Шэнь Миньжуаньтай Олон улсын хүүхдийн Найрамдал цогцолборт албан уулзалт хийлээ.

Миний бие элчин сайдад өмнө уулзахдаа Олон улсын хүүхдийн Найрамдал цогцолборт “Хятад хотхон” байгуулах төслийн санал болгож байсан юм. Энэ дагуу энэхүү албан уулзалт товлогдсон хэрэг.
Уг санаачилгын талаар элчин сайд хатагтай Шэнь Миньжуань
“Хагас зуун жилийн тэртээ Монгол Улс хүүхэд, залуучуудын хөгжил, хүмүүжилд онцгой ач холбогдол өгч, ийм томоохон хүүхдийн цогцолборыг байгуулсан нь танай улс хүүхэд, залуучууддаа ихээхэн анхаардаг бодлогын илэрхийлэл юм.
Хүүхдүүдээр дамжуулан хоёр улсын найрамдалт харилцааг улам бататгах Хятад хотхон төсөл нь чухал ач холбогдолтой санаачилга гэж үзэж байна. Хятадын талаас дэмжиж хамтран ажиллахад бэлэн байна” хэмээн онцлон тэмдэглэлээ.
Мөн энэ өдөр Олон улсын хүүхдийн Найрамдал цогцолборт амарч буй Күнз сургуулийн сурагчид урлагийн тоглолтоо толилуулж, хүрэлцэн ирсэн зочдод сонирхууллаа. Элчин сайд хатагтай Шэнь Миньжуань ирэх үед Хятад хэлний гүнзгийрүүлсэн сургалттай сургуулийн сурагчид Найрамдалд амарч, өөрсдийн урлагийн тоглолтоо үзүүлсэн нь хоёр орны найрамдал, хүүхэд залуучуудын нөхөрлөлийг илэрхийлсэн онцгой давхцал байлаа.

