Монголын шигшээ баг, тамирчдыг шинжлэх ухааны үндэслэлтэй бэлтгэлээ хангах “ОЛИМП” сэргэлтийн бааз Булган аймгийн Хангал сумын нутаг дэвсгэрт “Эрдэнэт үйлдвэр” ТӨҮГ-ын хөрөнгө оруулалтаар их засвар, шинэчлэлийн ажил эрчимтэй үргэлжилж байна.

“Үндэсний шигшээ багийн бэлтгэл, сургалтын төв” ТӨҮГ-ын хоёр дугаар төв “Олимп” бэлтгэл, сэргэлтийн бааз нь Улаанбаатар хотоос 460 км, Эрдэнэт хотоос 42км-ийн зайд байрладаг, нэг удаадаа 100 гаруй тамирчин хүлээн авах боломжтой бааз юм.

Олимпид оролцох тамирчид бэлтгэлээ хангах “Олимп” бэлтгэл сэргэлтийн баазын ажил 70 хувьтай үргэлжилж байна

Тамирчдын бие махбод, сэтгэл зүй физиологийн боломжийг дээд цэгт нь хүртэл дайчлах, ачааллын өмнө болон дараах нөхөн сэргээлтийг шинжлэх ухааны үндэслэлтэй, өндөр хяналт дор түргэн хугацаанд явуулж, олон улсын тэмцээн уралдаанд тогтмол, өндөр амжилт үзүүлэх нөхцөлийг бүрдүүлэх зорилго бүхий уг бааз ашиглалтад орсноор:

-Баг тамирчдын амжилтын чанарт дэвшил гарна.
-Санамсаргүй байдлаар хориотой эм, бэлдмэл хэрэглэх эрсдэл үгүй болно.
-Бэртэл гэмтэл 50–70 хувь буурна.
-Тамирчдын сэтгэл зүйн тогтвортой байдлыг нэмэгдүүлнэ.
-Мэргэжлийн спортын шинжлэх ухааны суурь тавигдана.

Өнөөдрийн байдлаар их засвар шинэчлэлийн ажлын явц 70 хувьтай, санхүүжилт, тоног төхөөрөмж зэрэг тулгамдсан асуудлуудыг Засгийн газарт танилцуулж, Соёл, спорт, аялал жуулчлал, залуучуудын яамнаас бүх талаар дэмжлэг үзүүлэхээ илэрхийлж холбогдох Биеийн тамир спортын хороо, яамны бодлогын газар удирдлагуудад тус баазыг 2027 оны 1-р улиралд ашиглалтад оруулах чиглэл өглөө. 2028 оны Лос Анжелесын олимпид оролцох баг тамирчдын бэлтгэлийг ШУ-ны үндэслэлтэй хийх нөхцөлийг бүрдүүлэхэд тус бааз чухал ач холбогдолтой юм.

УИХ-ын гишүүн, ССАЖЗ-ын сайд Ж.Алдаржавхлан:

“Олимпын аварга хаана байна, олимпын аварга бол гээд л шаардаад байдаг”. Гэтэл тэдгээр хүмүүст шинжлэх ухааны үндэслэлтэй бэлтгэл хийх боломжийг нь төр засаг гаргаж өгөх ёстой! Бид нар ҮШБ-ийн тамирчдад зориулсан “Олимп сэргэлтийн бааз”-ын үйл ажиллагаатай танилцаж байна. Олимп сэргэлтийн бааз маань Эрдэнэт үйлдвэрийн 2,2 тэрбум төгрөгөөр сэргээн засварлагдаад явж байна. Ажлын гүйцэтгэл 60-70%-тай явж байна. Тамирчдыг хотын дуу чимээ, стрессээс тусад нь гаргаж, гадагш авах билетийг нь авч өгөөд тэмцээнд явуулаад байх бус эх орондоо бэлтгэл хийх бололцоогоор нь хангах ёстой. Шигшээ багийн тамирчид маань гадна, дотнын тэмцээн уралдаан, Азийн болон дэлхийн аваргад оролцоход энэхүү сэргэлтийн бааз нэн чухал. Тиймээс энэ сэргэлтийн баазыг яаралтай буюу ирэх хавар гэхэд дуусгаж, ажиллагаанд оруулах зайлшгүй шаардлага байгаа. Ийм учраас миний бие өөрөө энд хүрэлцэн ирээд байна. Тамирчид маань 2028 оны Лос Анжелесын Олимп болон бусад ДАШТ-д медаль авч Монголын ард түмнийг баярлуулах олон боломж бүрдэнэ гэж итгэж байгаа. Иймд ЗГ-аас тус сэргэлтийн баазыг ашиглалтад оруулах ажил дээр өндөр ач холбогдол өгч байгаа. 2028 Лос Анжелесын олимп хаяанд ирчихсэн байна. Ирэх жил ЗГ-аас тамирчдаа гадаадад эрх авах тэмцээний зардлыг 3 дахин нэмсэн бөгөөд тамирчдаа бүхий л талаар дэмжинэ гэдгээ та бүхэндээ илэрхийлж байна" гэв.

Ж.Алдаржавхлан: Олимпын бэлтгэл хийх, эрх авах тэмцээнд оролцох зардлыг Засгийн газраас 3 дахин нэмэгдүүлнэ