САНААЧЛАН ЭХЛҮҮЛСЭН “ХҮСЛИЙН ХАД АЯЛАЛ ЖУУЛЧЛАЛЫН ЦОГЦОЛБОР”-ОО НЭЭЛЭЭ

Монгол Улсын аялал жуулчлалын гол бүс нутаг Хөвсгөл аймагт маань, жуулчдын аюулгүй байдлыг хангаж, ая тухтай аялах боломжийг нэмэгдүүлсэн бүтээн байгуулалт бий болгохоор УИХ-ын гишүүн, ХЗДХ-ийн сайд Л.Мөнхбаатарын зорьж эхлүүлсэн ажил  ийнхүү бодитоор биелэлээ оллоо.

Далай ээжийг маань жил бүр дунджаар 110 мянга гаруй дотоод, гадаадын жуулчин зорьж ирдэг. Тэдний олонхынх нь очиж, хүслээ шивнэдэг, нутгийн иргэдийн нэрлэдэгээр Сомо хад нэртэй энэхүү байгалийн тогтоцыг аялал жуулчлалын цогцолбор болгох ажил 2021 онд эхэлж, нутгийн иргэдээсээ санал аван эхлүүлж байлаа.

Өнөөдөр Хүслийн хад цогцолбор байгалийн чулуун зам, 12 жилийн бэлгэдэлт баримал, “Тэнгэрийн дусал” шүтээн, явган хүний гүүрэн гарц, завины зогсоол, амралтын тавцан, нутгийн иргэдийн гар урлалын бүтээгдэхүүн борлуулах цэг, ариун цэврийн байгууламжтай иж бүрэн төлөвлөлттэй болж шинэчлэгдлээ.

Цогцолборын бүтээн байгуулалтыг хурдан шуурхай, чанартай хийж, гүйцэтгэсэн “Жавхлант хүслэн” ХХК-ийн хамт олондоо халуун талархал илэрхийлье.Хойд бүсийнхээ тэргүүлэх чиглэл болсон аялал жуулчлалын салбарын бүтээн байгуулалтын төслүүдийг урагшлуулах, үр дүнд хүргэх чиглэлд цаашдаа ч анхааран ажиллах болно.