УИХ-ын чуулганы /2025.09.17/-ны өдрийн хуралдаанаар Монгол Улсын 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулах тухай хуулийн төслийг хэлэлцлээ.
Хэлэлцэж буй асуудалтай холбогдуулан гишүүд асуулт асуулаа.
УИХ-ын гишүүн А.Ариунзаяа:
2026 оны төсвийн хүрээний мэдэгдэл 27,28 оны төсвийн төсөөллийн тухай хуультай холбоотойгоор надад нэг асуулт байгаад байна. УИХ-ын чуулганы нээлтийн /2025.09.15/-ны өдөр олон сэтгүүлчид УИХ-ын гишүүдээс Монгол Хятадын ЗГ-ын хооронд байгуулсан хэлэлцээр, Гашуун сухайт, Ганц мод боомтын асуудалтай холбоотойгоор маш олон асуултуудыг асуулаа. УИХ-ын гишүүд улс орноо зарчихсан юм уу. 10 тэрбум долларын ашиг унагаасан ийм асуудал байна. Нүүрсээ хэдэн төгрөгөөр хэнд, хаана яаж борлуулаад байгаа юм бэ гэдэг ийм асуудлыг ярьсан, та нар ер нь мэдсэн юм уу УИХ-ын гишүүд ээ гэж. Энэ юу болоод өнгөрчхөв гэхлээр Монгол Улсын гурав дахь Ерөнхийлөгч нийгэмд мэдээлэл хийсэн. Засгийн газар хоорондын байгуулсан энэ гэрээн дээр Монгол Улсын Ерөнхийлөгчөөр ажиллаж байсан хүн ийм ойлголттой байхад, албан ёсны байр суурь илэрхийлээгүй маш удлаа.
Н.Энхбаяр гэдэг хүнийг нь хүндлэхгүй байж болно. Ядаж албан тушаалыг нь хүндлээд ЗГ-ын энэ хэлэлцээрийг зөв ойлгуулах тал дээр нь ЗГ өөрөө дуугарч ажиллах ёстой. Сүүлдээ энэ асуудлыг бүр улс төржүүлээд гишүүд нь би ч мэдээгүй болж, өмнөх засаг руугаа ч оруулаад, сүүлдээ АН-ыг буруутгаад байна гэж Б.Пүрэвдорж УИХ-ын дэд дарга өглөө асуусан. Эцэс сүүлдээ Д.Амарбаясгалан даргын зургийг нь тавьж байгаад улс орноо худалдсан хүн гээд л энэ гэрээтэй холбоод бичих юм. Ямар учир байна вэ? Үнэхээрийн тийм алдагдалтай гэрээ байгуулчихсан юм уу? 2024 оны 12 сард энэхүү гэрээ, хэлэлцээрийг байгуулахад үнэ баримтлах чиглэлийн тогтоолыгбаталсан. 2025 оны 3 сард хэлэлцээрийг соёрхон баталсан. Хэдхэн сарын өмнөх л асуудал. Бүгдээрээ гэнэт мэдэхээ байчихлаа. ЗГ үүн дээрээ албан ёсны байр суурь илэрхийлж ард иргэддээ үнэн зөв мэдээлэл өгсөн нь зөв байх.
Ерөнхийлөгчөөр ажиллаж байсан хүний амнаас гарч байгаа үг арай ч нэг худлаа улс төржилт баймааргүй юм. Ийм учраас үүн дээр УИХ-ын гишүүд ч гэсэн өөрийнхөө баталсан хуульдаа эзэн байж, ЗГ ч гэсэн оруулж ирсэн энэ хэлэлцээртээ эзэн нь байж, албан ёсны байр суурь, хариуг нь өгөх хэрэгтэй. Иргэд Ерөнхийлөгчөөр ажиллаж байсан хүний үгэнд итгэхгүй өөр яах юм. Үнэхээр үнэн яриад байна уу, худал яриад байна уу.