Сүүлийн 20 жилийн хугацаанд Монгол Улсын хэмжээнд төрөлт багасаж, гэр бүлийн салалт үлэмж ихэссэн. Эдгээр асуудлын гол шалтгаан нь санхүүгийн асуудлаас болсон гэх статистик гарсан бөгөөд үүнтэй холбогдуулан ГБХНХЯ-наас Гэр бүлийн хөгжлийн тухай хуулийн төслийг боловсруулсан талаар салбарын сайд Т.Аубакир мэдээлсэн.

Тухайлбал, Олон улсад гэр бүлийн хөгжлийг голцуу санхүүгийн хөшүүргээр буюу татварын хөнгөлөлтөөр дэмждэг туршлага байдаг учир Гэр бүлийн хөгжлийн тухай хуульд дараах заалтуудыг тусгажээ.

Гэр бүлийн хөгжлийн тухай хуульд туссан онцлох заалтууд:

Гурав ба түүнээс дээш хүүхэдтэй эхнэр нөхөр хоёр зэрэг хөдөлмөр эрхэлж байгаа бол нэгийг нь хөдөлмөрийн хөлс, түүнтэй адилтгах татварыг хүн амын орлогын албан татвараас нь чөлөөлөх
Дөрөв ба түүнээс дээш хүүхэдтэй айлын орон сууц худалдаж авах ипотекийн жагсаалтын дарааллыг урагшлуулах тухай асуудлыг тусгасан. Энэ нь ГБХНХЯ-ны хүн ам зүйн бодлогыг дэмжиж байгаа явдал юм гэв.
Мөн Эрүүл мэндийн гэр бүлийн багц даатгалын үйлчилгээг санал болгож байгаа бөгөөд гэр бүл нэг эрүүл мэндийн даатгал төлсөн байхад гэр бүлийн гишүүд эрүүл мэндийн үйлчилгээг авч болдог зэрэг хөшүүргүүдийг хуульд тусгав.

_{гэр бүлийн сайн сайхныг дэмжих асуудлыг хуулиар зохицуулах шаардлагатай}

Гэр бүл, хөдөлмөр, нийгмийн хамгааллын сайд Т.Аубакир, Гэр бүлийн хөгжлийн тухай хуулийг Гэр бүл, хүүхэд, залуучуудын хөгжлийн газар өргөн барьсан. Залуучууд энэ хуулийг дэмжиж байгаад баяртай байна. Монгол Улсын гал голомт болсон гэр бүл рүүгээ чиглэсэн, гэр бүлийн сайн сайхныг дэмжих асуудлыг хуулиар зохицуулах шаардлагатай. Энэ хууль олон жилийн хугацаанд боловсруулагдаж байгаа. Хуулийн гол зорилтуудын нэг нь, гэр бүлийн нэг гишүүнийг хүн амын орлогын албан татвараас чөлөөлөх явдал юм. Гэхдээ цалингийн дээд интервалыг тавьж өгөхгүй бол өндөр орлоготой гэр бүлийг дэмжсэн юм шиг болно. Засгийн газрын сонирхол дундаж гэр бүл рүүгээ чиглэх ёстой. Монгол Улсын цалингийн дундаж хэмжээ 2.5-2.7 сая төгрөг гэж үзэж байна. Энэ бол хэлэлцүүлгийн явцад өөрчлөгдөх байх.

_{Хүн амын төрөлтийг дэмжих нь Засгийн газрын нэгдүгээр бодлого}

Орон сууцаа борлуулсан тохиолдолд орлогын албан татвараас чөлөөлөх заалт байгаа. Ипотекийн зээлд хүүхдийн тоог харгалзан үзэж байгаа. Хүн амын төрөлтийг дэмжих нь Монгол Улсын Засгийн газрын нэгдүгээр бодлого юм. 15 жилийн өмнө жилдээ 80 мянган хүүхэд төрдөг байсан бол одоо 50 мянга руу ороод ирсэн. Энэ нь зөвхөн Монгол Улсын асуудал биш, дэлхий нийтийн асуудал болчихлоо.

Төрөлтийг дэмжихийн тулд хуулиар хөшүүрэг болгож, татвар шимтгэлээс хөнгөлөх, чөлөөлөх байдлаар гэр бүлийг олон хүүхэдтэй байх бодлогыг дэмжих хэрэгтэй. Гэр бүлийн эрүүл мэндийн багц даатгалын үйлчилгээг нэвтрүүлэх заалт байгаа. Нэг хүн даатгалаа төлчихсөн байхад түүгээрээ гэр бүлийн гишүүд нь эрүүл мэндийн үйлчилгээг авч болдог тогтолцоог бий болгох нь Монгол Улсын Засгийн газраас эрүүл гэр бүлийг дэмжих бодлогын нэг хэсэг юм.

_{Монгол Улсын нийгмийн даатгалын тогтолцоо муу биш!}

Монгол Улсын нийгмийн даатгалын тогтолцоо муу тогтолцоо биш. НҮБ-д бүртгэлтэй 193 улсаас 160 улс нь манай энэ тогтолцоогоор явж байгаа. Маш олон улс хуримтлалын тогтолцоо руу шилжээд, буцаад ухарч байна. Хуримтлалын тогтолцоо нь нийгмийн даатгалын шимтгэлийг авчхаад, түүнийгээ өсгөж үржүүлэх үүрэг хүлээдэг. Гэтэл сангийн мөнгө санхүүгийн хөрөнгө оруулалтын зах зээл рүү ордог. Хөрөнгө оруулалтын зах зээл нь өөрөө тогтвортой биш байдаг учраас ахмадуудыг тэтгэвэрт гаргах үед тэтгэвэр нь хэлбэлзэлтэй байж болохгүй. Нийгэм хамгааллын яамны үндсэн үүрэг нь ахмадуудынхаа нийгмийн баталгааг хангах явдал юм гэлээ.

Т.Аубакир: 4 ба түүнээс дээш хүүхэдтэй айлын ипотекийн зээлийн дарааллыг урагшлуулна