Монгол Улсын Шадар сайд Х.Ганхуяг Япон Улсад хийж буй ажлын айлчлалынхаа хүрээнд 2025 оны 11 дүгээр сарын 27-ны өдөр Токио хотноо Японы Олон улсын хамтын ажиллагааны байгууллага (ЖАЙКА)-ын ерөнхийлөгч А.Танака-тай уулзалт хийлээ.
Шадар сайд Х.Ганхуяг Япон Улсын Засгийн газрын Хөгжлийн албан ёсны тусламж Монгол Улс дахь ардчиллыг баталгаажуулж, нийгэм, эдийн засгийн тогтвортой хөгжлийг дэмжихэд нэн чухал ач холбогдолтой байж ирснийг онцолж, үүнд Японы Олон улсын хамтын ажиллагааны байгууллага (ЖАЙКА)-аас ул суурьтай судалгаанд суурилсан, үр өгөөжтэй олон төсөл хөтөлбөр хэрэгжүүлж, үнэтэй хувь нэмэр оруулж буйд чин сэтгэлийн талархал илэрхийлэв.

Тэрээр Япон Улсын Засгийн газраас Хөгжлийн албан ёсны тусламжийн иений хөнгөлөлттэй зээлийг эргэн сэргээж, энэ хүрээнд “Чингис хаан” олон улсын нисэх онгоцны буудлыг өргөтгөх, хүчин чадлыг нэмэгдүүлэх төсөл” болон “Инженер, технологийн дээд боловсролыг дэмжих төсөл”, түүнчлэн “Жижиг, дунд үйлдвэрийг хөгжүүлэх, байгаль орчныг хамгаалах 2 үе шаттай зээлийн төсөл” -ийн дараагийн ээлжийг үргэлжлүүлэх нь Монгол Улсын боловсрол, эдийн засаг, дэд бүтцийн хөгжлийг дэмжихэд чухал ач холбогдолтой гэдгийг онцолж, хамтран ажиллахыг хүслээ.
Түүнчлэн Монгол Улсын Засгийн газраас хэрэгжүүлж буй хөгжлийн бодлого, үйл ажиллагааны талаар дэлгэрэнгүй мэдээлж, бүтээн байгуулалтын томоохон төсөл, хөтөлбөрт Япон Улсаас хөрөнгө оруулалт татах, сайн туршлага, дэвшилтэт технологи нэвтрүүлэх чиглэлд хамтран ажиллахын төлөө байгааг хэллээ. Уулзалтаар талууд Монгол Улсын дэд бүтцийн чадавхыг сайжруулах, хүний нөөцийг хөгжүүлэх, бүсчилсэн хөгжлийг дэмжин туршлага солилцох зэрэгт үр өгөөжтэй төсөл, хөтөлбөр хэрэгжүүлж ажиллах талаар мөн ярилцав. Түүнчлэн, хүнсний бүтээгдэхүүн болон газрын тос хадгалах агуулах барих зэргээр онцгой байдлын үеийн бэлэн байдлыг хангах, байгалийн гамшиг, газар хөдлөлтийн тэсвэрлэлтийг сайжруулах чиглэлд хамтын ажиллагаагаа улам бүр бэхжүүлэх нь ач холбогдолтой гэдэгт санал нэгдэв.

Япон Улсын Засгийн газраас 1977-2024 онд манай улсад нийт 362.4 тэрбум иенийн зээл, тусламжийг үзүүлсэн. ЖАЙКА-гийн Монгол дахь Төлөөлөгчийн газар 1997 онд байгуулагдсан цагаас хойш манай улсын хөгжлийг дэмжихэд чиглэсэн идэвхтэй үйл ажиллагаа хэрэгжүүлсээр ирсэн юм.