Монгол Улсын Ерөнхийлөгчөөс өргөн мэдүүлсэн УИХ-ын тухай хуульд нэмэлт өөрчлөлт оруулах тухай хуулийн төслийн талаар нийгэмд талцал үүсэж, улс төрчид, экспертүүд олон талын байр суурийг илэрхийлэхтэй зэрэгцэн уг хуулийг хэлэлцүүлэх нь зүйтэй гэж өчигдөрхөн парламентын олонх үзэж, алх цохилоо.

Санал хураалтад чөлөөтэй, өвчтэй гэсэн шалтгаанаар оролцоогүй гишүүдээс "ам асуух" процесс ч өрнөж байх шиг байна.

УИХ-ын гишүүн О.Номинчимэг Олон улсын Парламентчдын хүний эрхийн хорооны Ерөнхийлөгчийн албыг хашиж байгаа тул хорооны хурлаа даргалж, дэлхийн улс орнуудын парламентад үүсээд байгаа асуудлууд дээр чухал шийдвэрүүд гаргахаар улсад бусад орны хууль тогтоогч нартай хамтран төлөвлөгөөт томилолтоор Турк улсад ажиллаж яваа.

Тэрбээр “Өөрөө санал хураалтад оролцож чадаагүй ч, нутагтаа байгаа мөртлөө ийм чухал санал хураалтад оролцоогүй зарим гишүүд маань яагаад ирсэнгүй вэ, юуны нөлөөлөлд орсон юм бол гэж эрхгүй бодогддог юм байна. Парламентын дархлаа гэдэг парламентын нэр хүнд гэхээсээ гишүүд үзэл бодлоо хэн нэгний нөлөөллөөс айлгүйгээр илэрхийлж, шийдвэр гаргахад оршдог. Энэ утгаараа парламентын дархлаа угаас суларчихсан байгааг өнөөдрийн үйл явдал харууллаа” хэмээн сэтгэгдлээ хуваалцав.

Олон орны хэрэг, кэйсүүд дээр ажиллаад ирэхээр геополитикийн нөхцөл байдал, ардчиллын мөн чанар, хамгаалж чадахгүй бол ямар үр дүнд хүрдгийг олон жишээн дээр харж болно.

Парламентчдын хүний эрхийн хорооны дээр хэлэлцүүлж буй зарим тохиолдлууд:

Израилын парламентаас энэ 3 дугаар сард зөвхөн палестинчүүдэд зориулсан цаазын ял шийтгэл өгөх хууль баталсан явдал болон энэ нь одоо Израилын шоронд хоригдож буй хэд хэдэн Палестины парламентчдын хувь заяанд хэрхэн нөлөөлөх талаар;
Бангладешт 2024 онд болсон бослого тэмцлийн дараа өмнөх парламентын гишүүд нь иргэдийнхээ эсрэг аллага явуулсанд буруутгагдаж шоронд хоригдсон, тус улсын шүүхийн бие даасан байдал, хараат бус байдал 16 жил үргэлжилсэн автократ маягийн дэглэмийн үр дүнд ямар түвшинд байгаа гэх мэт олон хурцадмал асуудлын талаар хэлэлцэж байгаа аж.

Энэ ярвигтай, хурцадмал хэргүүдтэй зэрэгцээд манай улсын асуудал ч энд яригдаж байна. Монгол Улс парламент дахь жендэрийн тэгш байдлаа дээшлүүлсэн үзүүлэлтээрээ 2025 оны ОУПХ-ны шагналыг хүртэж байсан бол өдгөө эмэгтэй парламентчийг айлган сүрдүүлсэн, хууль хяналтын байгууллагаар дарамталсан асуудлууд яригдлаа.

Түүнчлэн өнөөдөр хэлэлцсэн гишүүнийг эгүүлэн татах хуулийн төслийн агуулга болон парламентад үзүүлэх нөлөөллийн талаар ч Монголын кэйс дурдагдаж байгааг О.Номинчимэг гишүүн тодотгов.

160 улсын парламентч нар Монголын парламентад болж байгаа үйл явдлуудад өөрийнхөөрөө дүгнэлт, үнэлэлтээ өгч, хорооны шийдвэрүүд 4 сарын 19-нд нээлттэй танилцуулагдах юм байна.

О.Номинчимэг: Эмэгтэй парламентчийг айлган сүрдүүлж, хууль хяналтын байгууллагаар дарамталсан Монгол Улсын кэйс ОУП-ын Хүний эрхийн хороон дээр яригдаж байна