Үйл явдал2 мин унших
“Гоо сарнай 2026” онцлох эмэгтэй шалгаруулах үйл ажиллагаа 9 дэх жилдээ зохион байгуулагдлаа

Одоохон...
Үйл явдал2 мин унших

Социал Демократ Монголын Эмэгтэйчүүдийн Холбооны Архангай аймгийн салбар холбооноос уламжлал болгон зохион байгуулдаг “Гоо сарнай” онцлох эмэгтэй шалгаруулах үйл ажиллагаа 2026 оны тавдугаар сарын 16-ны өдөр Архангай аймгийн Эрдэнэбулган сумын Чингисийн хүрээ жуулчны баазад боллоо.



Энэхүү үйл ажиллагаа нь 2018 оноос тасралтгүй зохион байгуулагдаж байгаа бөгөөд энэ жил 9 дэх жилдээ амжилттай болж, аймаг, орон нутгийн хөгжилд бодит хувь нэмэр оруулж, ажил, гэр бүл, нийгмийн амьдралд идэвхтэй, тэнцвэртэй оролцож буй эмэгтэйчүүдийг тодруулан алдаршуулдгаараа онцлог юм.

“Гоо сарнай” үйл ажиллагааны зорилго нь мэргэжлийн ур чадвар, ёс зүй, манлайлал, эерэг хандлагаараа бусдад үлгэр дуурайлал болж буй эмэгтэйчүүдийг дэмжихийн зэрэгцээ байгальд ээлтэй хандлага, эмэгтэйчүүдийн оролцоо манлайллыг урамшуулахад чиглэж байна.
Энэ жилийн хувьд “Гоо сарнай 2026” үйл ажиллагааны номинациудыг шинэчлэн, хувь хүний хөдөлмөр бүтээл, амжилтаас гадна харилцаа, хандлага, нийгэмд үзүүлж буй эерэг нөлөөлөл, бодит үр дүнг илүү чухалчилсан шалгуураар нэр дэвшигчдийг үнэлсэн юм. Мөн “Манлайлагч эмэгтэй”, “Эмэгтэйчүүдийн шилдэг холбоо” зэрэг шинэ номинациудыг нэмсэн нь онцлог байлаа. Архангай аймгийн 19 сумаас нийт 41 эмэгтэй нэр дэвшин материалаа ирүүлснээс дараах оролцогчид “Гоо сарнай 2026” шилдгээр тодорлоо.
Үүнд:
• Эмэгтэйчүүдийн шилдэг холбоо — Хангай сумын салбар
• Баялаг бүтээгч эмэгтэй — Өндөр-Улаан сумын Д.Нямбуунядмаа
• Байгальд ээлтэй эмэгтэй — Хайрхан сумын Б.Мөнхзул
• Мэдлэг түгээгч эмэгтэй — Чулуут сумын Г.Анхтуяа
• Ажил, амьдралын манлайлагч эмэгтэй — Ихтамир сумын Н.Номин-Эрдэнэ
• Эрүүл амьдралын элч — Эрдэнэбулган сумын С.Бямбачулуун
• Соёлын өв тээгч эмэгтэй — Хотонт сумын Н.Аясуу
• Тангарагт албаны бахархалт эмэгтэй — Эрдэнэбулган сумын Д.Бэрцэцэг
• Манлайлагч эмэгтэй — Эрдэнэбулган сумын П.Анударь шалгарлаа.



Тус арга хэмжээнд 260 гаруй эмэгтэй оролцсон бөгөөд Социал Демократ Монголын Эмэгтэйчүүдийн Холбооны Ерөнхийлөгч, УИХ-ын гишүүн Д.Үүрийнтуяа, Ерөнхий нарийн бичгийн дарга У.Өнөрцэцэг, УИХ-ын гишүүн Б.Хэрлэн, УИХ-ын гишүүн М.Энхцэцэг болон СДМЭХ-ны Ажлын албаны баг бүрэлдэхээн ч мөн оролцлоо.

“Гоо сарнай 2026” үйл ажиллагаа нь орон нутгийн эмэгтэйчүүдийн оролцоо, манлайллыг дэмжих, тэдний нийгэмд үзүүлж буй эерэг нөлөөллийг олон нийтэд таниулах, сайн туршлагыг түгээн дэлгэрүүлэх ач холбогдолтой арга хэмжээ болж өндөрлөлөө.

