Үйл явдал2 мин унших
“Түншлэл–2026” олон улсын бизнес форум эмэгтэй бизнес эрхлэгчдийн хамтын ажиллагааг өргөжүүлж байна

Сэтгүүлч Б.Хонгорсайхан
Одоохон...
Үйл явдал2 мин унших

Сэтгүүлч Б.Хонгорсайхан
Форумын хүрээнд дөрвөн улсын төлөөлөгчид худалдаа, хөрөнгө оруулалт, экспорт, импорт, технологи, инноваци, боловсрол, аялал жуулчлалын чиглэлээр санал солилцож, B2B уулзалтаар бизнесийн бодит холбоо тогтоох, шинэ зах зээл, хөрөнгө оруулалт, хамтарсан төсөл хөгжүүлэх боломжуудыг хэлэлцэж байна.
СДМЭХ энэхүү форумд гишүүн бизнес эрхлэгч эмэгтэйчүүдээ олон улсын бизнесийн төлөөлөгчидтэй шууд холбох, гадаад зах зээлд гарах боломжийг нэмэгдүүлэх, хөрөнгө оруулалт, технологи, мэдлэгийн шинэ эх үүсвэртэй холбох чиглэлээр оролцож байна. Энэ нь эмэгтэйчүүдийн эдийн засгийн оролцоог зөвхөн сургалт, арга хэмжээгээр бус, бизнесийн бодит харилцаа, зах зээл, түншлэлээр дэмжихэд чиглэж буйгаараа ач холбогдолтой.
Тус форум нь СДМЭХ-ны өмнө эхлүүлсэн олон улсын харилцааны бодит үргэлжлэл болж байна. Тухайлбал, СДМЭХ энэ оны 6 дугаар сарын 6-нд БНСУ-ын Global Management Support Association (GMSA)-тай хамтын ажиллагааны санамж бичиг байгуулж, хоёр улсын бизнес эрхлэгчдийн сүлжээг хөгжүүлэх, худалдаа, хөрөнгө оруулалт, импорт, экспортын харилцааг өргөжүүлэх, хамтарсан төсөл хэрэгжүүлэх, сургалт, харилцан айлчлал зохион байгуулах, дижитал шилжилт болон хиймэл оюун ухааны чиглэлээр хамтран ажиллахаар тохиролцсон юм.
Энэ удаагийн форумд GMSA-ийн тэргүүн Жан Ми Чан тэргүүтэй БНСУ-ын төлөөлөгчид оролцож байгаа нь байгуулсан санамж бичгийг бодит ажил хэрэг болгон үргэлжлүүлж, бизнесийн шууд уулзалт, мэдлэг, технологийн солилцоо, шинэ түншлэлээр өргөжүүлэх боломж болж байна.
Форумын үеэр эмэгтэйчүүдийн бизнес эрхлэлт, худалдаа, хөрөнгө оруулалт, хиймэл оюун ухаан, дижитал хөгжил, инноваци, аялал жуулчлал, боловсрол, шинжлэх ухааны чиглэлээр цаашид хамтран хэрэгжүүлэх төсөл, хөтөлбөрийн талаар санал солилцож байна.
Энэхүү оролцоо нь СДМЭХ-ны 2026–2030 оны W-O-M-E-N таван тулгуурт бодлогын Opportunity болон Entrepreneur чиглэлийн бодит хэрэгжилтийн нэг хэсэг бөгөөд эмэгтэй бизнес эрхлэгчдийг олон улсын зах зээл, хөрөнгө оруулалт, технологи, мэдлэг, бизнесийн шинэ сүлжээтэй холбох зорилготой. СДМЭХ-ны W-O-M-E-N бодлогод Opportunity нь эмэгтэйчүүдийн боломж, боловсрол, манлайллыг, Entrepreneur нь эдийн засгийн оролцоо, бизнес, инновацийг дэмжихэд чиглэдэг.
“Түншлэл–2026” форум нь нэг удаагийн уулзалтаар хязгаарлагдахгүй, олон улсын харилцааг гишүүн эмэгтэйчүүдэд хүрэх бодит бизнесийн боломж, урт хугацааны хамтын ажиллагаа болгон хөгжүүлэх чухал алхам болж байна.