Байр суурь2 мин унших
Б.Мөнхсоёл: Хувийн тэтгэврийн сан үүсгүүлэхийн тулд ажилтан талд өдөөгдөх хүчин зүйл маш чухал
Сэтгүүлч Б.Цэцэгсүрэн
Одоохон...
Байр суурь2 мин унших
Сэтгүүлч Б.Цэцэгсүрэн
УИХ-ын чуулганы /2026.07.01/-ний өдрийн нэгдсэн хуралдаанаар Нийгмийн даатгалын ерөнхий хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцлээ.
Хэлэлцэж буй асуудлаар УИХ-ын гишүүн Б.Мөнхсоёл дараах байр суурийг илэрхийллээ.
Нийгмийн даатгалын Ерөнхий хуульд нэмэлт, өөрчлөлт орж тэтгэврийн сангийн шинэчлэлийн үйл явц эхэлж буйд баяртай байна. Ажилтан, ажил олгогчийн НДШ-ийн хувь хэмжээ чинь хэвээрээ байгаа. Нөгөө талдаа ажил олгогчийн нийт цалингийн сангийн 5%-ийг татвараас чөлөөлнө гэжээ. Энэ хэмжээг яаж тогтоосон бэ?
Ажилтан талдаа 2 сая төгрөгт үзүүлэх хувь хэмжээ нь хангалттай биш юм уу даа гэж харж байна. Жинхэнэ утгаараа тэтгэврийн санг урт удаан хугацааны хөрөнгө оруулалтын сан болгохын тулд анхаарах ёстой зүйлс байна. Хувийн тэтгэврийн сан үүсэхэд ажилтан талд мотивац өдөөгдөх хүчин зүйл чухал. Улсад 11,5%-ийн шимтгэл төлж байгаа үед юугаараа тэтгэврийн санд мөнгө илүүчилж хөрөнгө оруулах вэ? Боломжтой улсууд нь арилжааны банк, үнэт цаасны зах зээлд хөрөнгө оруулдаг хэвээрээ байна. Үүнтэй харьцуулахад илүү өгөөжтэй, илүү боломжийг нээсэн байх ёстой. Хувийн тэтгэврийн сангууд үүсчих юм бол хувийн секторт урт хугацааны хөрөнгө оруулалтын боломжуудыг нээх нөхцөл болно. Тэр утгаараа энэ реформын эхлэлийг дэмжиж байна.
Баталгаат тэтгэврийн 3 шатлалт үе гэж байна. 100-аас 300 мянган төгрөгийг орлого доогуур байгаа иргэддээ олгохоор заажээ. Үүнийг гүйцэд судлах ёстой. Нийгмийн даатгалын сангаасаа авч буй тэр дүнтэй уялдуулж, дүйцүүлж, сайн томьёолж тооцохгүй бол бодит амьдрал дээр хийдэл гарах вий! Мөн босго тавимаар санагдсан. Татварыг чөлөөлөх хэсэг дээр ямар тохируулга байх вэ? Илүү өндөр орлоготой иргэдэд арай бага хөнгөлөлт байх уу гэх мэт зааг хэрэгтэй. Цаашид боловсронгуй хөгжсөн улсуудын түвшинд хүрэхийн тулд явц дундаа сайжруулалт хэрэгтэй.