Үйл явдал2 мин унших
Хөгжлийн бэрхшээлтэй иргэдийг бие даан амьдрахад дэмжих чиглэлээр түгээмэл хөгжлийн төв тбб-ын төлөөлөлтэй уулзлаа

Сэтгүүлч Ц.Соёлмаа
Одоохон...
Үйл явдал2 мин унших

Сэтгүүлч Ц.Соёлмаа
Өнөөдөр Түгээмэл хөгжлийн төв ТББ-ын хамт олонтой уулзаж, хөгжлийн бэрхшээлтэй иргэдийн бие даан амьдрах эрх, нийгмийн оролцоог нэмэгдүүлэх талаар санал солилцлоо. Тус төвтэй Баянгол дүүргийн Засаг даргаар ажиллаж байх үеэсээ хамтран ажиллаж ирсэн бөгөөд хөгжлийн бэрхшээлтэй иргэд өөрсдийн хүчээр сурч, хөдөлмөрлөж, нийгмийн амьдралд идэвхтэй оролцож байгааг харах бүрд энэ чиглэлд илүү ихийг хийх ёстой гэсэн бодол төрдөг.
Уулзалтын үеэр ЖАЙКА-гийн төслийн зөвлөх **Okita Dai** Япон болон бусад орны туршлагаас хуваалцаж, хөгжлийн бэрхшээлтэй иргэдийг халамж хүртэгч гэж бус, нийгмийн идэвхтэй оролцогч байх боломжийг бүрдүүлэх нь хамгийн чухал гэдгийг онцоллоо. Мөн хэрэгжүүлж буй төслүүдийн сайн туршлагад тулгуурлан Монголын долоон аймагт жишиг төслүүдийг хэрэгжүүлэхээр ажиллаж буйгаа танилцуулсан нь ихээхэн сонирхол татсан юм.
Бид хөгжлийн бэрхшээлтэй иргэдийг зөвхөн халамж авагч гэж харах хандлагаасаа татгалзах хэрэгтэй. Харин тэднийг бусдын адил сурч, ажиллаж, зорчиж, нийгмийн харилцаанд бие даан оролцох боломжийг бодлогоор дэмжих нь хамгийн чухал. Энэ хүрээнд хувийн туслах үйлчилгээ чухал байр суурь эзэлнэ. Энэ нь зөвхөн асаргаа, халамжийн үйлчилгээ биш, харин хөгжлийн бэрхшээлтэй иргэдийг гэр бүлийнхнээсээ бүрэн хараат бус амьдрах, өөрийн хүссэнээр боловсрол эзэмших, хөдөлмөр эрхлэх, нийгмийн амьдралд идэвхтэй оролцоход нь дэмжлэг үзүүлдэг тогтолцоо юм. Нөгөө талаас хувийн туслах үйлчилгээ нь шинэ ажлын байр бий болгож, нийгэм, эдийн засгийн хувьд ч үр өгөөжтэй шийдэл болно.

Мөн Түгээмэл хөгжлийн төвийн хэрэгжүүлсэн сайн туршлагад тулгуурлан Улаанбаатар хотын зарим дүүрэг болон орон нутагт хөгжлийн бэрхшээлтэй иргэдийн бие даан амьдрахыг дэмжих жижиг төвүүдийг үе шаттайгаар байгуулах чиглэлээр хамтран ажиллахаар ярилцлаа.
Хөгжлийн бэрхшээлтэй иргэдийн нийгмийн оролцоог нэмэгдүүлэхэд зөвхөн ярилцах биш, бодит ажил хэрэгжүүлэх нь хамгийн чухал. Энэ чиглэлд Түгээмэл хөгжлийн төв болон бусад түнш байгууллагуудтайгаа хамтран ажиллаж, хүн бүр өөрийн сонголтоор, хараат бус амьдрах боломжтой хүртээмжтэй нийгмийг бүтээхийн төлөө бодит алхмуудыг хийх болно.