Үйл явдал4 мин унших
БНХАУ-ын Бээжингийн Зам, харилцааны их сургуулийн тэтгэлэгт хөтөлбөрт шалгарсан оюутнуудтай уулзлаа
Эх сурвалж:
Зам тээврийн яамОдоохон...
Үйл явдал4 мин унших
Эх сурвалж:
Зам тээврийн яамМонгол Улсын төмөр замын салбарын хүний нөөцийн хэрэгцээ жилээс жилд өсөн нэмэгдэж байна. Сүүлийн жилүүдэд стратегийн ач холбогдол бүхий төмөр замууд ашиглалтад орж, цаашид хил дамнасан болон шинэ чиглэлийн төмөр замын бүтээн байгуулалт эрчимжихийн хэрээр дэлхийн түвшний мэдлэг, ур чадвартай инженер, техникийн ажилтан, мэргэжилтнүүдийг бэлтгэх шаардлага улам бүр нэмэгдэж байна.
Энэ хүрээнд Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр (2026.08.08) БНХАУ-ын Бээжингийн Зам, харилцааны их сургуулийн тэтгэлэгт хөтөлбөрт шалгарсан оюутнуудтай уулзаж, төмөр замын салбарын хүний нөөцийн бодлого, залуу мэргэжилтнүүдэд нээгдэж буй боломж, цаашдын хамтын ажиллагааны талаар санал сэтгэгдлээ илэрхийллээ.
Уулзалтын үеэр Зам, тээврийн сайд Монгол Улсад төмөр замын салбар үүсэж хөгжсөний 88 жилийн ой, “Улаанбаатар төмөр зам” нийгэмлэг байгуулагдсаны 77 жил, “Монголын төмөр зам” ТӨХК байгуулагдсаны 18 жил, “Тавантолгой төмөр зам” ХХК байгуулагдсаны 8 жилийн ойн баярын мэндийг ирээдүйн төмөр замчдад хүргэж, тэтгэлэгт хөтөлбөрт амжилттай шалгарсан оюутнуудад баяр хүргэлээ.
ТӨМӨР ЗАМЫН СҮЛЖЭЭ 2019 ОНООС ХОЙШ ХОЁР ДАХИН ӨРГӨЖИН ТЭЛЖЭЭ
Монгол Улсын төмөр замын салбар сүүлийн жилүүдэд эрчимтэй хөгжиж, Тавантолгой-Зүүнбаян, Тавантолгой-Гашуунсухайт, Зүүнбаян-Ханги зэрэг стратегийн ач холбогдол бүхий төмөр замууд ашиглалтад орсноор төмөр замын сүлжээ 2019 онтой харьцуулахад хоёр дахин өргөжөөд байна.
Үүнийг дагаад экспорт, импорт болон дамжин өнгөрөх ачаа тээврийн хэмжээ нэмэгдэж, салбарын хүний нөөцийн хэрэгцээ ч өсөн нэмэгдэж байгааг тэмдэглэн хэллээ.
Өнөөдрийн байдлаар төмөр замын салбарт 18 мянга орчим хүн ажиллаж байгаа ч цаашид хэрэгжих томоохон бүтээн байгуулалт, өсөн нэмэгдэж буй тээврийн эрэлтийг хангахын тулд өндөр ур чадвартай инженер, техникийн ажилтан, мэргэжилтнүүдийг олноор бэлтгэх шаардлагатайг салбарын сайд онцоллоо.
Тухайлбал, Монгол Улс, БНХАУ-ын төмөр замын хоёр дахь хилийн гарц болох Гашуунсухайт-Ганцмод чиглэлийн хил дамнасан төмөр замын бүтээн байгуулалт, нийслэл хотын төвөөр тээвэрлэгдэж буй аюултай ачааг хотын гадуур нэвтрүүлэх зорилготой Багахангай-Хөшигийн хөндий-Эмээлт чиглэлийн төмөр замын ажил эрчимтэй үргэлжилж байна.
Эдгээр төсөл ашиглалтад орсноор Монгол Улсын уул уурхайн бүтээгдэхүүний экспортын хүчин чадал нэмэгдэхийн зэрэгцээ аюултай ачаа тээврийг нийслэлийн төвөөр тээвэрлэхгүй байх нөхцөл бүрдэх юм. Тиймээс өсөн нэмэгдэж буй энэ хэрэгцээг хангахуйц чадварлаг, өндөр ур чадвартай хүний нөөц бүрдүүлэх нь төмөр замын салбарын тэргүүлэх зорилтуудын нэг гэдгийг салбарын сайд онцлон тэмдэглэлээ.
ЗТЯ-НААС ЗАЛУУСТ ДЭЛХИЙН ТҮВШИНД БОЛОВСРОЛ ЭЗЭМШИХ БОЛОМЖИЙГ НЭЭЖ ӨГЧ БАЙНА
Энэхүү салбарын боловсон хүчнийг бэлтгэх зорилго, зорилтын хүрээнд Зам, тээврийн яам, Төмөр замын газар болон БНХАУ-ын Бээжингийн Зам, харилцааны их сургуультай хамтран “Монгол-Хятадын төмөр замын салбарын боловсон хүчин бэлтгэх хамтарсан тэтгэлэгт хөтөлбөр”-ийг хэрэгжүүлж байна.
Төмөр зам, тээврийн чиглэлээр БНХАУ-д тэргүүлэх их сургуулиудын нэг болох Бээжингийн Зам, харилцааны их сургуульд монгол залуусыг суралцуулах боломж бүрдүүлж байгаа нь салбарын хүний нөөцийг бэхжүүлэхэд чухал ач холбогдолтойг Б.Дэлгэрсайхан сайд онцоллоо.
2026 онд тэтгэлэгт хөтөлбөрт шалгарсан 29 оюутантай “Монголын төмөр зам” ТӨХК, “Улаанбаатар төмөр зам” ХНН, “Тавантолгой төмөр зам” ХХК хамтран гэрээ байгуулж, оюутнуудыг сургуулиа төгссөний дараа тухайн байгууллагуудад тодорхой хугацаанд тогтвор суурьшилтай ажиллуулах, эзэмшсэн мэдлэг, ур чадвараа эх орондоо хэрэгжүүлэх боломжийг бүрдүүлэн ажиллаж байна.
Мөн оюутнууд сурлагын өндөр амжилт үзүүлж, шаардлага хангасан тохиолдолд БНХАУ-ын Засгийн газрын бүрэн тэтгэлэгт хамрагдах боломжтой талаар уулзалтын үеэр танилцууллаа.
”ТА БҮХЭН ЗӨВХӨН ӨӨРИЙГӨӨ БУС МОНГОЛ УЛСАА ТӨЛӨӨЛЖ ЯВНА. ХАРИУЦЛАГАТАЙ САЙН СУРАЛЦААРАЙ"
Зам, тээврийн сайд Б.Дэлгэрсайхан оюутнуудад хандаж, гадаад улсад суралцах хугацаандаа зөвхөн мэргэжлийн мэдлэг эзэмшихээс гадна эх орныхоо нэрийг өндөрт өргөх хариуцлага хүлээж байгааг онцлон захилаа.
Тэрээр хэлсэн үгэндээ “Та бүхэн зөвхөн өөрийгөө бус, Монгол Улсаа төлөөлж явна. Хариуцлагатай, сахилга баттай, сайн суралцаж ирээрэй” хэмээн захиж, БНХАУ-д суралцах хугацаандаа тухайн улсын хууль тогтоомж, сургуулийн дүрэм журмыг чанд мөрдөж, ёс зүйтэй, хариуцлагатай, үлгэр жишээ оюутан байхыг уриаллаа.
Мөн төмөр замын салбарын ирээдүйн мэргэжилтнүүдэд хятад хэлний мэдлэгээ тогтмол дээшлүүлэхийг зөвлөж, хэлний мэдлэг нь зөвхөн их сургуулиа амжилттай төгсөх төдийгүй цаашид олон улсын түвшинд ажиллах мэргэжилтэн болоход чухал суурь болохыг тэмдэглэв.
Зам, тээврийн яамнаас цаашид тэтгэлэгт хамрагдсан оюутнуудын суралцах үйл явцад анхаарч, дэмжлэг үзүүлэн ажиллахаа илэрхийллээ.
Зам, тээврийн сайд Б.Дэлгэрсайхан ирээдүйн төмөр замчдад сурлагын өндөр амжилт, эрүүл энх, сайн сайхан бүхнийг хүсэн ерөөж, эзэмшсэн мэдлэг, ур чадвараа эх орныхоо хөгжилд зориулахыг уриаллаа.
ЗТЯ-наас 2026 оны тэтгэлэгт хөтөлбөрийн батламж гардуулах ёслолын ажиллагаанд Монгол Улсын Засгийн газрын гишүүн, Зам, тээврийн сайд Б.Дэлгэрсайхан, Зам, тээврийн яамны Төрийн нарийн бичгийн дарга М.Баярмагнай, Бодлого төлөвлөлтийн албаны дарга Л.Баянзул, Төмөр замын газрын Суурь бүтцийн газрын дарга Д.Мөнхбат, “Монголын төмөр зам” ТӨХК-ийн Ерөнхий инженер Б.Даваасүрэн болон холбогдох албаныхан оролцлоо.