Нийгмийн даатгалын багц хуульд орсон нэмэлт, өөрчлөлтийн хэрэгжилтийг хангах, хууль тогтоомжийг ажил олгогч, даатгуулагч, иргэд, олон нийтэд сурталчлан таниулах зорилготой сургалтыг 2026 оны 09 дүгээр сарын 14-ний өдөр хамтран ажиллагч байгууллагуудын төлөөллийг хамруулан зохион байгууллаа.

Тус сургалтад нийгмийн даатгалын үйл ажиллагаанд хяналт тавих, сурталчлан таниулах, иргэд, даатгуулагчдын эрх ашгийг хамгаалах чиглэлээр хамтран ажилладаг дараах байгууллагуудын төлөөлөл оролцов.

Үүнд:
• Нийгмийн даатгалын үндэсний зөвлөлийн болон зөвлөлийн дэргэдэх Олон нийтийн хяналтын зөвлөл, Мэргэжлийн хорооны гишүүд;
• Монгол Улсын Их Сургууль, Шинжлэх Ухаан, Технологийн Их Сургууль, Санхүү Эдийн Засгийн Их Сургуулийн багш, захиргаа, хүний нөөцийн менежер, мэргэжилтнүүд;
• Монголын Үндэсний Худалдаа Аж Үйлдвэрийн Танхим, Монголын Ажил Олгогч Эздийн Нэгдсэн Холбоо, Монголын Мэргэшсэн Нягтлан Бодогчдын Институт, Татварын Мэргэшсэн Зөвлөхийн Нийгэмлэг, Монголын Даатгалын Зах Зээлийн Холбооны багш, мэргэжилтнүүд;
• Нийгмийн даатгалын ерөнхий газрын болон дүүргүүдийн Нийгмийн даатгалын газрын ахмадын төлөөлөл;
• Аймаг, орон нутгийн Ажил олгогч эздийн холбоод, "Шимтгэл төлөгч таны төлөө" төрийн бус байгууллагын төлөөлөл хамрагдлаа.
Сургалтаар Нийгмийн даатгалын багц хуулийн шинэчлэл, нэмэлт өөрчлөлтүүд, тэдгээрийг практикт хэрэгжүүлэх арга зүй, нийгмийн даатгалын цахим үйлчилгээ болон ажил олгогч, даатгуулагчдад зөв тодорхой мэдээлэл хүргэх ур чадварыг олгосон юм.

Энэхүү сургалтаар бэлтгэгдсэн багш, мэргэжилтнүүд цаашид салбар салбарынхаа ажилтнууд, гишүүн байгууллагууд болон иргэдэд Нийгмийн даатгалын багц хуулийг сурталчлан таниулах ажилд манлайлан оролцох юм.

Хамтран ажиллагч байгууллагуудын төлөөллийг сургалтад хамрууллаа