3 мин унших
Дэлхийд эхний 500-д багтдаг БНХАУ-ын хөрөнгө оруулагчид “Барилга, дэд бүтцийн хөрөнгө оруулалтын форум-2025”-д оролцлоо

Монгол Улс, БНХАУ-ын хооронд эдийн засгийн хамтын ажиллагааг гүнзгийрүүлэх, барилга, дэд бүтцийн салбар дахь хөрөнгө оруулалтыг нэмэгдүүлэх зорилгоор “Барилга, дэд бүтцийн хөрөнгө оруулалтын форум-2025” 2025 оны 9 дүгээр сарын 18-20-ны өдрүүдэд Улаанбаатар хотноо амжилттай зохион байгуулагдлаа.
Форумыг Монгол Улсын Засгийн газрын гишүүн, Шадар сайд Т.Доржханд нээж үг хэлэхдээ хоёр улсын эдийн засгийн хамтын ажиллагаа сүүлийн жилүүдэд эрчимтэй хөгжиж буйг онцлон тэмдэглэж, энэхүү форум нь хөрөнгө оруулалтын шинэ боломжуудыг нээх, хамтын ажиллагааг шинэ түвшинд гаргах чухал алхам болохыг дурдав.

Мөн Хөрөнгө оруулалт, худалдааны газраас мэдээлэл, харилцааны хэлтсийн дарга Б.Зандан "Хөрөнгө оруулалтын орчин ба нөхцөл" сэдвийн хүрээнд танилцуулга хийлээ.
БНХАУ-аас Монгол Улсад суугаа Онц бөгөөд Бүрэн эрхт Элчин сайд Шэнь Миньжуань хоёр орны харилцаа, хамтын ажиллагаа батжин бэхжиж, стратегийн түншлэлийн хүрээнд шинэ шатанд гарч байгаад талархал илэрхийлэв.
Форумын хүрээнд Дэлхийн шилдэг 500 компанийн тоонд багтдаг БНХАУ-ын томоохон хөрөнгө оруулагчид, төсөл хэрэгжүүлэгчид болох Shanghai Construction Group, China Railway Signal & Communication Co., Ltd, China North Industries Corporation, China Machinery Engineering Corporation, Beiben Trucks Group Co., Ltd, Shaanxi Construction Engineering Corporation зэрэг 150 гаруй компани Монгол Улсад хэрэгжүүлж буй болон хэрэгжүүлэхээр төлөвлөж буй төсөл, хөтөлбөрүүдээ танилцуулж, хамтын ажиллагааны боломжуудыг хэлэлцлээ.
БАРИЛГЫН САЛБАРЫН ЭДИЙН ЗАСГИЙН ҮЗҮҮЛЭЛТ, ХӨРӨНГӨ ОРУУЛАЛТЫН ОРЧИН,
ФОРУМЫН АЧ ХОЛБОГДОЛ
Монгол Улсын 2024 оны урьдчилсан гүйцэтгэлээр Дотоодын нийт бүтээгдэхүүн 80.0 их наяд төгрөгт хүрч, өмнөх оноос 13.5 хувиар өссөн нь эдийн засгийн өсөлт тогтвортой үргэлжилж байгааг илтгэж байна. Энэ өсөлтөд барилгын салбар 0.3 нэгж хувийн хувь нэмэр оруулсан бөгөөд салбарын дотоодын нийт бүтээгдэхүүнд эзлэх хэмжээ 3.3 хувьд хүрсэн нь барилгын салбар нь эдийн засгийн бүтцэд чухал байр суурь эзэлж байгааг;
Гадаадын шууд хөрөнгө оруулалтын хувьд 1990-2024 оны хооронд Монгол Улсад нийт 48.3 тэрбум ам.долларын хөрөнгө оруулалт орсон бөгөөд үүнээс барилгын салбар 2.0 хувийг эзэлж, ойролцоогоор 1.0 тэрбум ам.долларыг бүрдүүлжээ. 2011-2024 оны хооронд тус салбарын жилийн дундаж урсгал хөрөнгө оруулалт 65.8 сая ам.долларт хүрсэн нь салбарын хөрөнгө оруулалтын орчин тогтвортой, өсөлттэй байгааг;
Хөдөлмөрийн зах зээлийн хувьд 2024 онд барилгын салбарт ажиллагсдын тоо 93,165-д хүрч, өмнөх оноос 13.5 хувиар өссөн нь нийт ажиллагсдын 6.9 хувийг эзэлж байна. Сүүлийн 10 жилийн хугацаанд тус салбарын ажиллагсдын эзлэх хувь нийт ажиллагсдын 5.6–7.7 хувийн хооронд хэлбэлзэж байгаа нь барилгын салбар нь тогтвортой ажлын байр бий болгож, хөдөлмөр эрхлэлтийн чухал салбар байсаар байгааг тус тус илтгэж байна.
Эдгээр макро эдийн засгийн үзүүлэлтүүд нь Монгол Улсад барилгын салбарын эдийн засагт эзлэх байр суурь, хөрөнгө оруулалтын чадавх, хүний нөөцийн хөгжил тогтвортой өсөж байгааг нотолж байна. Ийм нөхцөлд зохион байгуулагдсан Монгол, Хятадын “Барилга, дэд бүтцийн хөрөнгө оруулалтын форум-2025” нь хоёр орны бизнесийн хамтын ажиллагааг өргөжүүлэх, хөрөнгө оруулагчдад бодит мэдээлэл, боломжийг олгох, салбарын хөгжилд шинэ хөшүүрэг болох чухал арга хэмжээ боллоо.









