УИХ-ын чуулганы /2025.12.11/-ний өдрийн хуралдаанаар “Тогтоолд нэмэлт оруулах тухай” Улсын Их Хурлын тогтоолын төслийн эцсийн хэлэлцүүлгийг хийлээ.
УИХ-ын гишүүн П.Сайнзориг асуулт асууж, ХХААХҮ-ийн сайд М.Бадамсүрэн хариуллаа.
УИХ-ын 1999 оны тогтоолд заасны дагуу ЗГ-т тодорхой эрх өгөх зохицуулалт байгаа. Энд тухайн боомт зааж болно. Мөн татварыг тэг хүртэл тогтоох эрхийг түр хугацаанд ЗГ-т өгч байгаа. ААН иргэдийн хувьд анхаарах зүйл нь Баруун бүсийн 5 боомтоор гурилыг импортоор оруулж ирэх. Мөн малын тэжээлийг импортоор оруулж ирэхэд ЗГ-аас тогтоосон тэр хэмжээгээр хөнгөлөлт эдэлнэ гэсэн үг.
Манай яамны зүгээс энэ тогтоол өнөөдөр батлагдсан тохиолдолд ирэх 7 хоногийн 3 дахь өдөр хоригийн хугацааг тооцоод аль болох хурдан хугацаанд ЗГ-т тогтоолын төслийг танилцуулна. Ингээд ЗГ-аар шийдвэр гарна. Эрх авсан тохиолдолд тэжээлийн одоо байгаа 5%-ийг тэг хувиар, гурилын импортын 15%-ийн татвар байгааг тэг хувиар гэсэн саналаа ЗГ-т оруулна. ЗГ эцсийн шийдвэр гаргана.
Өөрөөр хэлбэл Баруун бүсийн нэр заасан 5 боомтоор импортын татваргүй малын тэжээл болон гурил оруулж ирэх боломж бүрдэх юм. Хугацааны хувьд 4 дүгээр сарын 15 хүртэл буюу өвөл, хаврын хүндрэлтэй цаг нөхцөлд гэж тогтоож байгаа. Энэ хугацаанаас хойш тухайлсан татварууд сэргээд явна.
Газрыг ашиглах төлөвлөгөөний хувьд П.Сайнзориг гишүүнтэй санал нэг байна. Цаашид бэлчээрийн доройтол их хэмжээгээр нэмэгдэж байгаа. Төрөөс хийж, хэрэгжүүлж дэмжиж чадах гол ажил нь экспортыг бүх талаар дэмжих. Манай яамны хувьд экспортлоход квот тогтоодог байсныг квотгүй болгосон. Мөн гадаад яриа хэлэлцээрийг аль болох нэмэгдүүлэхийг зорьж байгаа.
Цаашид олон худалдааны хэлэлцээрүүд байгуулагдаж нэмэгдвэл үүн дээр олон боломжууд нэмэгдэнэ. Малчдын хувьд олон төрлийн дэмжлэг гэхээс илүүтэй мах, түүхий эдийн маань үнэтэй болгож экспортлох боломжийг төр бүрдүүлж өгөөч гэдэг хүсэлтийг тавьж байгаа. Тэгэхээр малын тоо толгой гэхээсээ илүү чанарт шилжүүлж, малчдын орлогыг мах түүхий эдээс нэмэгдүүлж, бэлчээрийн даацыг хэтрүүлэхгүй байх нь эдийн засгийн гол “хөшүүрэг” болно.
