Үйл явдал2 мин унших
Өвөрхангай аймгийн Баян-Өндөр сумын гуравдугаар багийн малчин Х.Бат-Эрдэнэд “Улсын аварга малчин” цолыг нь гардууллаа

Одоохон...
Үйл явдал2 мин унших

Жаврын үзүүр уярч, цаг наашилсан энэ өдрүүдэд өвлийн турш зузаан цастай байсан Баян-Өндөр нутгийн өнгө төрх өнөө харин тарлан бараантаж харагдана. Уул, талдаа эгэл малчин түмний амьдрал амгалан үргэлжилж, хот айл бүрд хөдөлмөрийн энгүүн хэмнэл жигдэрнэ.
Өвөрхангай аймгийн Баян-Өндөр сумын гуравдугаар багийн малчин Хорлоогийн Бат-Эрдэнэд “Улсын аварга малчин” цолыг нь гардуулан хүндэтгэхээр УИХ-ын гишүүн О.Алтангэрэлийн хамт Өвөрзүлэгт багт ирлээ.


Тэрбээр 30 гаруй жил мал аж ахуй эрхэлж, үндэсний баялаг болсон мал сүргээ тууштай өсгөн үржүүлж, 2017 онд “Сумын аварга малчин”, 2020 онд “Аймгийн аварга малчин” цол хүртэж, 2023 онд 300 ямаанаас 300 төл бойжуулан “Алтан ишиг”-ний эзэн болжээ.
Сүүлийн арван жилд мал сүргийнхээ тоо толгойг мянгаас дээш тогтвортой хадгалж, сүргийн чанар, ашиг шимийг сайжруулахад онцгой анхаарч ирсэн байна. Мөн хээлтэгч, хээлтүүлэгчийн зохистой харьцааг бүрдүүлэх, мал сүргээ бүртгэлжүүлэх, өвөлжөө, хаваржаагаа засаж сайжруулах, усан хангамжаа нэмэгдүүлэх зэрэг ажлыг үе шаттай хийж, отор нүүдлээ оновчтой төлөвлөн, хадлан тэжээлээ хангалттай бэлтгэдэг хөдөлмөрч, туршлагатай малчин билээ.

Түүнчлэн мал сүргээ товлосон хугацаанд тарилга, туулгалтад бүрэн хамруулж, бэлчээрийг төлөвлөгөөний дагуу сэлгэн ашиглах, өнжөөх зэргээр даацыг нь тохируулж, экологийн тэнцвэрийг хадгалдаг ажээ.
Мал маллах арга ухаанаа залуу үед өвлүүлэн сургаж, нутаг орныхоо хөгжилд үнэтэй хувь нэмэр оруулж буй буянт малчны хөдөлмөрийн үр шимээр нутгийн зон олон бахархаж байна. Эрдэнэт мал сүргийн тань буян хишиг арвижин дэлгэрч байх болтугай.