Үйл явдал2 мин унших
Зам, тээврийн сайД Б.Дэлгэрсайхан “Говийн бүсийн хөгжил–2026” өдөрлөгийг нээж үг хэллээ

Сэтгүүлч Б.Хонгорсайхан
Одоохон...
Үйл явдал2 мин унших

Сэтгүүлч Б.Хонгорсайхан
Өмнөговь аймгийн Даланзадгад хотод “Монголын төмөр зам” ТӨХК-иас зохион байгуулж буй “Говийн бүсийн хөгжил–2026” өдөрлөг өнөөдөр эхэлж, Зам, тээврийн сайд Б.Дэлгэрсайхан нээлтийн үг хэллээ.
Тэрбээр Монгол Улсын Засгийн газрын 2024–2028 оны үйл ажиллагааны хөтөлбөрт тусгагдсан 14 мега төслийн тэргүүлэх чиглэлд багтсан хил дамнасан төмөр замын төслүүд болох Гашуунсухайт–Ганцмод, Ханги–Мандал, Шивээхүрэн–Сэхээ боомтын төмөр замын холболтыг байгуулахаар төлөвлөж байгааг онцлов. Мөн говийн бүсэд шинээр баригдах төмөр замуудтай уялдуулан ачаа тээврийн шилжүүлэн ачих терминалууд байгуулах юм.

Эдгээрээс хамгийн эхний томоохон бүтээн байгуулалт болох Гашуунсухайт–Ганцмод боомтын хил дамнасан төмөр замын төсөл нь БНХАУ-ын талтай 2008 оноос хойш 17 жилийн хугацаанд 60 гаруй удаагийн хэлэлцээрийн үр дүнд шийдвэрлэгдэж, 2025 оны 6 дугаар сарын 15-нд албан ёсоор эхэлсэн. Одоогоор барилгын ажлын гүйцэтгэл 10 хувьтай үргэлжилж байна.
Тус төсөл нь 1955 онд байгуулсан Монгол-Хятадын хилийн төмөр замын хэлэлцээрийн хүрээнд Замын-Үүд–Эрээн боомтын төмөр зам ашиглалтад орсноос хойш 70 жилийн дараа хэрэгжиж буй хоёр дахь хил дамнасан төмөр зам гэдгээрээ онцлог юм.
Гашуунсухайт–Ганцмод боомтын төмөр замыг 2027 оны зургаадугаар сард ашиглалтад оруулахаар төлөвлөж байгаа бөгөөд төсөл хэрэгжсэнээр:
Говийн бүсэд 170 орчим шинэ ажлын байр бий болох,
Нүүрсний экспорт жилд 83 сая тонноос 165 сая тонн болж нэмэгдэх,
Нүүрс борлуулалтын орлого жилд 1.5 тэрбум ам.доллараар өсөх,
Нэг хүнд ногдох ДНБ 10 мянган ам.долларт хүрэх,
Эдийн засгийн өсөлтийг 6 хувиас дээш түвшинд хадгалах,
Инфляцыг 5 хувьд барих зэрэг эдийн засгийн чухал үр өгөөжтэй гэж үзэж байна.
Мөн төмөр замын салбарт “Чингис хаан” олон улсын нисэх буудлын орчимд байгуулагдаж буй “Хүннү хот” дагуул хоттой холбогдох Багахангай–Хөшигийн хөндийн салбар төмөр замын бүтээн байгуулалт 84 хувийн гүйцэтгэлтэй үргэлжилж байгаа бөгөөд 2026 оны эхний хагаст ашиглалтад оруулахаар төлөвлөж байна.
Сүүлийн жилүүдэд говийн бүсэд ашиглалтад орсон Тавантолгой–Гашуунсухайт, Тавантолгой–Зүүнбаян, Номгон–Ханги чиглэлийн төмөр замуудаар тээвэрлэсэн ачааны хэмжээ 2024 онд 8.9 сая тонн, 2025 онд 12.4 сая тонн хүрсэн бол 2026 онд 22 сая тонн ачаа тээвэрлэхээр төлөвлөж байгаа хэмээн онцоллоо.