Дэлхийн цаг төрийн байдал хурцдаж, дайн мөргөлдөөн дэгдэж, олон улс орон энергийн эх үүсвэр түлш, шатахууны хомсдолд орж, хэмнэлтийн горимд шилжсэн тогтворгүй байна. Ийм эгзэгтэй хүнд нөхцөлд манай улсад тогтвортой Засгийн газар юу, юунаас илүү чухал. Гэтэл өнөөдрийг хүртэл сайдын яриа хэлэлцэл, тохироо үргэлжилсэн. Улс төр тогтворгүй, эзэнгүй төрийн нүүр царай үргэлжилж байгаа нь туйлын харамсалтай юм.

Өнөөдөр зоригтой асуудлыг шийдээд явах сайд нар засагт хэрэгтэй гэж Засагт ажиллаж байсан зарим сайд нар байр сууриа илэрхийлж байгаа. Тухайлбал УИХ-ын гишүүн О.Алтангэрэл.

Тэрээр “шинээр томилогдох сайд нар сайн мэргэшсэн хүмүүс байгаасай гэж харж байна. Аль нэг нам улс улс төржилтийн нүдээр биш, улс орныг хөгжүүлэхийн төлөө, өнөөдөр тулгамдаад буй асуудлыг зоригтой барьж авдаг, гал авч, асуудлыг шийддэг хүмүүс хэрэгтэй байна. Өнөөдөр шүүмжлүүлэх, муу хэлүүлэх нь нэг асуудал. Харин асуудал шийдээд үлдэх нь өөр асуудал. Иймд зоригтой шийдэл гаргах хүмүүс томилогдох нь чухал.

ХЗДХ-ийн сайдаар ажиллаж байсан хүний хувьд энэ яаманд дэд сайд хэрэгтэй байдаг. ХЗДХ гэсэн 2 том чиг үүрэгтэй. Дотоод хэргийн чиг үүрэгт нь цагдаагийн байгууллага, хил хамгаалах байгууллага зэрэг олон байгууллагууд багтдаг. Гэтэл нөгөө талд хууль тогтоомжийг боловсронгуй болгох, хууль зүйн чиглэлээр ахиц дэвшил гаргах шаардлагатай, хууль зүйн чиг үүргээ хэрэгжүүлэх ёстой болдог. Ингээд үндсэн чиг үүргээ хэрэгжүүлэхэд яамдууд дээр дэд сайдуудын хэрэгцээ байдаг. Харин дэд сайд шаардлагагүй дийлэнх яамд бий.Үүн дээр Ерөнхий сайдын дэвшүүлж байгаа байр суурийг зөв л гэж харж байна. Түүнчлэн хууль зүйн салбарт өнгөрсөн жилүүдэд явагдаж байсан шинэчлэлүүдийг үргэлжлүүлэх, ялангуяа иргэндээ ойртох, хүний эрх эрх чөлөөг хамгаалах чиглэлээр тууштай ажилладаг сайд байгаасай.

Тухайлбал Хамтарсан Засгийн газрын үед миний бие ХЗДХ-ийн сайдаар ажиллаж байхдаа Хэвлэлийн эрх чөлөөний тухай, Жагсаал цуглаан хийх эрх чөлөөний тухай хууль зэрэг хүний эрхийн багц хуулиудыг өргөн барьсан. Харамсалтай нь өнөөдрийг хүртэл хэлэлцэгдээгүй. Иймээс хүний эрх талдаа мэдрэмжтэй шинэчлэл хийе гэсэн зоригтой хүн энэ салбарт ирэх хэрэгтэй” гэсэн байр суурьтай байна.

Одоо хурал хаях, бойкот хийх цаг биш харин ажлаа хий, асуудлаа шийд гэж ард түмэн шаардаж байна.

О.Алтангэрэл: Гал авч, асуудлыг шийдэх зоригтой сайд нар томилогдоосой!