УИХ дахь МАН-ын бүлгийн өнөөдөр /2026.05.18/-ийн хуралдаанаар дараах асуудлуудыг хэлэлцлээ.

Хуралдааны эхэнд Монгол Улсын Ерөнхий сайд Н.Учрал улс орны эдийн засгийн өнөөгийн нөхцөл байдал, цаашид авч хэрэгжүүлэх арга хэмжээ, Засгийн газраас өргөн барьсан хуулийн төслийн танилцуулга болон цаг үеийн асуудлаар мэдээлэл өгөв.

Үүний дараа Монгол Улсын Ерөнхийлөгчийн Сонгуулийн тухай хуульд нэмэлт, өөрчлөлт оруулах тухай хуулийн төслийг хэлэлцэв.
Хуулийн төслийн гол зорилго нь санал авах өдөр хүрэлцэн ирж чадахгүй сонгогч санал авах өдрөөс өмнөх 3 хоногийн дотор харьяа санал авах байранд урьдчилан очиж, санал өгч болохоор хуульчилж, сонгогчдын сонгох эрхийг бодитоор хэрэгжүүлэх, санал өгөх боломжийг нэмэгдүүлэх эрх зүйн орчин бүрдүүлэх юм. Гадаад улсад ажиллаж, амьдарч байгаа 240 мянган иргэн сонгуульд оролцохын тулд урьдчилан бүртгүүлэх шаардлагатай байсан бол шинэ хуулийн дагуу уг шаардлагыг хасаж, иргэд шууд санал өгөх боломжтой болно. Гадаадад санал авах хугацаа санал авах өдрөөс 13 хоногийн өмнө эхлэж, 5 хоногийн турш санал авах ажлыг зохион байгуулж, цагийг 07:00–17:00 цаг байхаар тусгасан байна.

Хуулийн төслийг батласнаар сонгогчдын оролцоо нэмэгдэж, Монгол Улсын Ерөнхийлөгчийн сонгуулийн эрх зүйн орчин боловсронгуй болно. Тус хуулийн төслийн хамт Сонгуулийн автоматжуулсан системийн тухай хуульд нэмэлт, өөрчлөлт оруулах тухай хуулийн төслийг өргөн барьсан байна.
Бүлгийн хуралдаанд оролцсон гишүүдийн олонх хуулийн төслийг хэлэлцэхийг дэмжлээ.

Мөн УИХ-ын гишүүн Б.Пүрэвдорж нарын өргөн мэдүүлсэн Нэмэгдсэн өртгийн албан татварын тухай хуульд нэмэлт өөрчлөлт оруулах тухай хуулийн төсөл болон УИХ-ын гишүүн Ж.Баярмаа нарын өргөн мэдүүлсэн Хувь хүний орлогын албан татварын тухай хуульд өөрчлөлт оруулах тухай хуулийн төслийн танилцуулгыг сонслоо.