#Тойрог2 мин унших
Орхон аймагт хэрэгжиж буй “Оюутан цэрэг” сургалтад зургаан аймгийн нийт 76 оюутан суралцагч хамрагдаж байна

Одоохон...
#Тойрог2 мин унших

Энэ жил “Эрдэнэт цогцолбор” их сургууль болон Орхон аймаг дахь Политехникийн коллежид суралцаж буй зургаан аймгийн нийт 76 оюутан суралцагч тус сургалтад хамрагдаж байна.

Улсын хэмжээнд 2025-2026 оны хичээлийн жилд “Оюутан цэрэг” сургалтад нийт 5000 орчим оюутан хүсэлт ирүүлснээс эрүүл мэнд болон бие бялдрын шалгуур хангасан 2300 гаруй суралцагч 2026 оны дөрөвдүгээр сарын 4-ний өдрөөс эхлэн “Цэргийн ерөнхий бэлтгэл” шатны сургалтад хамрагдаж байна.
Сургалтын хуваарийн дагуу оюутнууд тавдугаар сарын 24-ний өдөр хүртэл танхимын сургалтад суралцах бөгөөд зургаадугаар сарын 15-наас эхлэн хээрийн дадлага, сургуулилалтад хамрагдаж сургалтаа төгсөнө.
Энэ жилийн сургалтаар “Оюутан цэрэг” сургалтын агуулгыг шинэчлэн боловсруулж, суралцагч болон багшийн гарын авлагыг бүрэн шинэчилж, биеийн тамирын нэмэлт хичээлийг сургалтын хөтөлбөрт тусгаснаар онцлогтой.

Түүнчлэн бүртгэлийг “E-Mongolia” үндэсний цахим системээр зохион байгуулснаар мэдээллийн давхардал, бүртгэлийн зөрчил бүрэн арилсан нь онцлох шинэчлэл болсон юм.
“Оюутан цэрэг” хөтөлбөр нь 2013 онд Монгол Улсын Ерөнхийлөгчийн зарлигаар эхлэлээ тавьж, 2014 оноос хэрэгжиж эхэлсэн. Улмаар 2016 онд Цэргийн албаны тухай хуульд нэмэлт, өөрчлөлт орсноор тус сургалтад сайн дурын үндсэн дээр хамрагдан цэргийн мэргэжил эзэмшсэн оюутнуудыг цэргийн алба хаасанд тооцож, I зэргийн бэлтгэл үүрэгтнээр бүртгэх эрх зүйн орчин бүрдсэн юм.
2014-2026 оны хооронд нийт 10 мянга гаруй оюутан залуус энэхүү сургалтаар дамжуулан цэргийн мэргэжил эзэмшээд байна.
