#Коммент3 мин унших
Хүүхдүүд өөрсдийн дуу хоолой, үзэл бодолд ач холбогдол өгөхийг хүсэж байна

Сэтгүүлч Б.Хонгорсайхан
Одоохон...
#Коммент3 мин унших

Сэтгүүлч Б.Хонгорсайхан
Өвөрхангай аймгийн хэмжээнд бүтэн өнчин хүүхдийн тоо 2024 онд 96 байсан бол 2025 онд 129 болж өссөн. Мөн хагас өнчин хүүхдийн тоо болон жолоодох эрхийн зөрчил гаргасан хүүхдийн тоо маш эрчимтэй өсөх хандлагатай байна. Гэмт хэргийн улмаас нас барсан хүүхдийн тоо тасралтгүй өсөж байгаа бөгөөд 2026 оны эхний 4 сарын байдлаар хоёр хүүхэд амь насаа алджээ. 2021 онд хоёр, 2022 онд дөрвөн хүүхэд зам тээврийн ослоор амиа алдсан бол 2025 онд энэ тоо огцом өсөж, 9 хүүхэд харамсалтайгаар амиа алджээ.
Хүний эрхийн Үндэсний Комиссын Монгол Улс дахь хүний эрх, эрх чөлөөний талаарх тайлан илтгэлүүдийг жил бүр УИХ-аар хэлэлцүүлж, тогтоол баталдаг. Ингэхдээ илтгэлийг зөвхөн Улаанбаатарт хэлэлцэхээс гадна орон нутгийн түвшинд ч хэлэлцүүлэг өрнүүлж, саналууд авч, түүнийгээ УИХ-аас гарах тогтоолд тусгах нь чухал юм.
Тиймээс уг ажлын эхлэл болгож Хүний эрхийн дэд хорооноос санаачлан ХЭҮК-ын 25 дахь илтгэлийн хүүхэд хамгааллын тогтолцооны зарим асуудал, хүүхдийн эрх сэдвээр хэлэлцүүлгийг 2026 оны 5 дугаар сарын 18-ны өдөр Өвөрхангай аймгийн Арвайхаар сумын Нутгийн удирдлагын ордонд зохион байгууллаа. Хэлэлцүүлэгт УИХ-ын гишүүн, Хүний эрхийн дэд хорооны дарга Х.Баасанжаргал, УИХ-ын гишүүн, Хүний эрхийн дэд хорооны гишүүн О.Алтангэрэл, Монгол Улсын Хүний эрхийн Үндэсний Комиссын гишүүн Ж.Хунан болон Өвөрхангай аймгийн хүүхдүүдийн төлөөлөл, хүүхдийн байгууллагын ажилтнууд, орон нутгийн шийдвэр гаргах түвшний удирдлагууд оролцлоо.
"Монгол Улс дахь хүний эрх, эрх чөлөөний талаарх 25 дахь илтгэл"-д тусгасан "Хүүхэд хамгааллын тогтолцоонд тулгамдаж буй зарим асуудал" сэдэвт хэлэлцүүлгийг УИХ-ын дарга С.Бямбацогт нээж, цахимаар хэлсэн үгэндээ, хүний эрхийн илтгэл болон УИХ-ын шийдвэрүүдийн хэрэгжилтийн биелэлтийг хангуулах, хүүхэд хамгааллын асуудлыг орон нутагт хэлэлцүүлж, бодит шийдлийг боловсруулах нь чухал ач холбогдолтойг онцоллоо.

Хүүхдийн эрхтэй холбоотой хэлэлцүүлгийг Өвөрхангай аймагт хийж байгаа нь хэд хэдэн онцлох шалтгаантай. Тухайлбал, тус аймаг нь хүүхдийн эрх, хамгааллын чиглэлээр олон шинэ санаачлагыг орон нутагт анх удаа, үр дүнтэй хэрэгжүүлсэн онцлогтой юм. Тухайлбал, одоогоос 25 жилийн өмнө сум, багууддаа хүүхдийн ажилтны орон тоог бий болгож, хүүхдийн тусламжийн 108 утасны үйлчилгээг нэвтрүүлсэн. Мөн хөгжлийн бэрхшээлтэй хүүхдийг тээвэрлэх үйлчилгээ, хүүхдийн оролцоог хангах тогтолцоог бүрдүүлэх, хүйтний улиралд хурдан морины уралдааныг хориглосон шийдвэр гаргасан зэргээрээ анхдагч аймагт тооцогддог ажээ.
ХЭҮК-ын гишүүн Ж.Хунан “Бид томчууд хүүхдүүдийн өмнөөс асуудлыг шийдэх биш, хүүхдийн оролцоотойгоор асуудлыг шийддэг зарчим руу шилжих ёстой. Хүүхдүүд өөрсдийн дуу хоолой, үзэл бодолд ач холбогдол өгөхийг хүсэж байна. Хүүхэд бол бидний, манай улс орны ирээдүй учраас тэднийг аюулгүй, эрүүл орчинд өсөх нөхцөлөөр хангах нь насанд хүрсэн хүн бүрийн үүрэг юм. Өнөөдөр хүүхэд хамгааллын тогтолцооны нэгжүүдийн уялдаа холбоо, мэдээлэл солилцоо хангалтгүй байгаагаас үйлчилгээ доголдож байна. Хүүхэд хамгаалал бол зөвхөн нэг газрын ажил биш, маш олон салбарын хамтын ажиллагааны үр дүн юм” гэлээ.