Дотоодод үйлдвэрлэсэн болон импортоор оруулж ирдэг зарим эм чанарын шаардлага хангахгүй, эмийн үйлчилгээ сул, манай лабораториуд хянаж чадахгүйгээс үйлчлүүлэгч эрүүл мэнд, амь нас, эд хөрөнгөөрөө хохирдог нь нууц биш!

Бага болон дунд орлоготой орнуудад ашиглагдаж байгаа 10 эм тутмын нэг нь стандартын шаардлага хангаагүй эсвэл хуурамч байдаг! Энэ бол зөвхөн техникийн асуудал биш, хүний амь насанд аюул учруулж буй асуудал юм. Хүчирхэг эмийн лаборатори гэдэг нь зүгээр нэг барилга, байгууламж бус нийгмийг эрсдэлээс хамгаалдаг хамгаалалтын тогтолцоо юм. Тэгвэл Монгол Улс өнөөдөр энэхүү хамгаалалтаа улам бэхжүүллээ.

Засгийн газар ард иргэдээ чанарын шаардлага хангаагүй эмийн эрсдэлээс хамгаалах зорилтыг эрүүл мэндийн салбарын тэргүүлэх чиглэл болгон хэрэгжүүлнэ гэдгийг онцоллоо.

Тухайлбал Эм, эмнэлгийн хэрэгслийн үндэсний лавлагаа лабораторийг шинэчилж ашиглалтад орууллаа. Ингэснээр эхний ээлжид эм, эмнэлгийн хэрэгслийн үндэсний лавлагаа лабораторийн хүчин чадлыг ашиглан дотоодын зах зээлд зарагдаж буй бүх эмийг нэг сарын хугацаанд шинжлэх юм.

Лабораторийг Дэлхийн банкны санхүүжилтээр шинэчлэн байгуулж ашиглалтад оруулжээ.

Үндэсний лавлагаа лаборатори ашиглалтад орсноор:

-Хүчин чадал нэмэгдэж, жилд 4000–5000 дээжид шинжилгээ хийнэ

-Иргэдэд хүрч буй эм, эмнэлгийн хэрэгсэл чанаржлаа

-Хяналт, шинжилгээний чадавхыг олон улсын түвшинд хүргэв

-Орчин үеийн багаж, тоног төхөөрөмж, дэвшилтэт системүүдийг үе шаттайгаар нэвтрүүллээ

-Мэргэжилтнүүдийг чадавхжуулж эхэллээ

-Олон улсын түвшинд хүлээн зөвшөөрөгдөх лаборатори болгон хөгжүүлэх эхлэл тавигдав

-Эмийн чанарын хяналтыг дэлхийн шилдэг стандартад нийцүүллээ

ДЭМБ болон ЭМЯ хамтран 2025 онд эхлүүлсэн 1.8 сая ам.долларын өртөгтэй төслийн хүрээнд лабораторийн байрыг бүрэн шинэчиллээ. Хийн систем, агааржуулалт болон уурын системийг олон улсын эмийн чанарын лабораторийн түвшинд хүргэв.

Шинэ лабораторид нийт 49 нэр төрлийн 77 тоног төхөөрөмжийг үе шаттайгаар суурилуулж байна. Өнөөдрийн байдлаар 35 төхөөрөмжийг суурилуулав.

Эм, эмнэлгийн хэрэгслийн үндэсний лавлагаа лаборатори ашиглалтад орсноор эмийн салбарын хяналт, зохицуулалт шинэ шатанд гарч байна

Эрүүл мэндийн сайд Э.Батшугар, Эмийн чанар, аюулгүй байдал нь зөвхөн эрүүл мэндийн салбарын асуудал биш. Энэ бол иргэн бүрийн амь нас, эрүүл мэнд, төрийн үйлчилгээнд итгэх итгэл, үндэсний аюулгүй байдлын нэг чухал бүрэлдэхүүн хэсэг юм. Иймээс Монгол Улсын Засгийн газар эмийн зохицуулалт, чанарын хяналтын тогтолцоог олон улсын жишигт хүргэх зорилтыг тууштай хэрэгжүүлж байна гэв.

Манай улсад эмчийн чадвар биш эмийн чанар дутагдаж байна!