Байр суурь2 мин унших
О.Саранчулуун: Ипотекийн зээл гэхээр байр нь бага талбайтай, хүүхэд тоглох, ногоон орчингүй байж болохгүй!
Сэтгүүлч Б.Цэцэгсүрэн
Одоохон...
Байр суурь2 мин унших
Сэтгүүлч Б.Цэцэгсүрэн
УИХ-ын чуулганы /2026.07.03/-ны өдрийн хуралдаанаар Орон сууцны санхүүжилтийн төрөлжсөн банкны тухай хуулийн төсөл болон хамт өргөн мэдүүлсэн хуулийн төслүүдийг хэлэлцлээ.
Хэлэлцэж буй асуудлын хүрээнд УИХ-ын гишүүн О.Саранчулуун дараах байр суурийг илэрхийлж, Ажлын хэсгээс тодруулга авлаа.
Орон сууцын банк, орон сууцтай холбоотой овоорсон их асуудал бий. Монгол Улс саяхан "Бест гэр" гэдэг үнэлгээний системтэй болсон. Энэ нь тухайн барилга эрчим хүчний хэмнэлттэй юу, усны хэрэглээ бага уу, нүүрстөрөгчийн ялгарал багатай юу, хүртээмжтэй юу, дотоод орчны чанар сайн уу муу юу гэдгийг тодорхойлдог. Үүнийг Монголын ногоон таксономитой уялдуулсныг ногоон хөрөнгө оруулалт гэнэ гэдгээ ямартай ч тодорхойлчихсон. Дараагийн түвшинд санхүүгийн байгууллагуудтай үүнийг уялдуулаад хэрхэн зээлтэй холбогдох, ямар нөхцөл байх, ипотект хамаарах эсэхийг ярих хэрэгтэй болж байгаа.
Ипотекийг амьдрахад таатай орчинд уг зээл хэрэгжиж байгаа эсэх нь учир дутагдалтай байгаа. Тухайлбал, Хангай хотхонд мод байхгүй. Амьдрахад таатай, ногоон, хүртээмжтэй гэдэг үзүүлэлт хангагдаагүй гэсэн үг. Бусад хорооллууд ч мөн адил. Тэгэхээр ипотекийн зээл гэхээр бага талбайтай, хүүхэд тоглох, ногоон орчингүй байж болохгүй шүү дээ. Үүнд ямар шинэчлэл хийх вэ?
Зээлийн шалгууруудад "бест гэр"-ийнхээ шалгууруудыг оруулж эхлэх үү? Нөгөө талдаа орон сууцаас гадна хүртээмжтэй таун хаусууд, байшингаа бест гэр зарчмаар барьж байгаа хүмүүст ямар боломж олгох вэ?
Ордны гадаа нэг өвөө миний санаж байгаагаар 2 жил сууж байна. Халамжаас өөр ямар ч орлогогүй хүн хэдэн цагаар тэргэнцэр дээр надад орон гэр өгөөч ээ гээд сууж байна. Тэд хүсэлтээ Хөгжлийн бэрхшээлтэй хүний агентлагт өгөөд, тэр нь барилгын салбарынхан руу явахаар дунд нь хүлээж буй олон хүн байна. Тэгэхээр группийн орлоготой, халамжаас өөр орлогогүй хүмүүст ямар бололцоо бий болох вэ? Хөгжлийн бэрхшээлтэй хүмүүст чиглэсэн "ажил хийвэл дэмжье" гэдэг бодлогын хүрээнд ипотекийн очер дээр уян хатан хандах асуудал юу болсон бол?