Үйл явдал1 мин унших
Б.Жаргалан: Сонгууль бол эрх баригчдад хариуцлага тооцдог тогтолцоо юм!

Одоохон...
Үйл явдал1 мин унших

Ардчилсан улсад улс төрийн намууд мөрийн хөтөлбөрөөрөө өрсөлддөг. Улс орны өмнө тулгамдсан асуудалд хэн илүү сайн шийдэл санал болгосон нь сонгуульд ялдаг. Амлалтаа хэрэгжүүлж, ажлаа сайн хийж чадвал дахин сонгогдоно. Хийж чадахгүй бол ялагдана.
Өөрөөр хэлбэл, сонгууль бол эрх баригчдад хариуцлага тооцдог тогтолцоо юм.
Даанч манайд энэ тогтолцоо эвдэрчээ.
2016 онд МАН газрын тос боловсруулах үйлдвэр байгуулж, дотоодын хэрэгцээгээ хангана гэж амласан. УИХ-д үнэмлэхүй олонх болж, Засгийн газраа байгуулсан. Өмнөх Засгийн газар нь Энэтхэгийн хөнгөлөлттэй зээлийн эх үүсвэрийг шийдээд өгчихсөн байхад л ганц үйлдвэр барьж чадалгүй дараагийн сонгуультай золгосон.
2020 онд дахин амласан. Дахиад олонх болсон. Газрын тосны үйлдвэр хөдөлсөнгүй.
2024 онд бас л амласан. Дахиад олонх болсон. Мөнөөх үйлдвэрийн өртөг хэд дахин нэмэгдсэн ч ашиглалтад ороогүй хэвээр.
Гурван сонгууль. Арван жил.
Энэ хугацаанд шатахууны асуудалд ахиц гарсангүй. Харин ч улам даамжрав.
Яагаад?
Яагаад гэвэл бид амлалтаа биелүүлээгүй эрх баригчдад сонгуулиар хариуцлага тооцож чадахгүй байна. Шинэ дарга гарч ирнэ, төслийн талбай дээр очно, гоё рийл хийлгэнэ. “Энэ асуудлыг шийднэ” гэж хэд хоног ПиАр-дана. Аялдан дагалдагчид нь түүнийг магтана. Тэгээд зохиол дуусна. Дараагийн дарга гарч ирнэ. Түүх дахиад л давтагдана.
Энэ чөтгөрийн тойргийг сонгуулиар хариуцлага тооцож байж л бүр мөсөн тасална.