УИХ-ын чуулганы /2026.11.19/-ны өдрийн хуралдаанаар Монгол Улсын Ерөнхийлөгчийг үүрэгт ажлаас нь чөлөөлөх тухай асуудлыг хэлэлцлээ.
Хэлэлцэж буй асуудалтай холбогдуулан гишүүд асуулт асууж, байр сууриа илэрхийллээ.
УИХ-ын гишүүн, Батлан хамгаалахын сайд Д.Батлут:
Таны энэхүү шийдвэрийг би хүндэтгэн хүлээж авч дэмжиж байна. Та Монгол Улсын Зэвсэгт хүчний Ерөнхий командлагчаар ажиллах хугацаандаа өөрийн дэвшүүлэн тавьсан мөрийн хөтөлбөр, хэлсэн амлалтдаа бүрэн дүүрэн хүрсэн гэдгийг манай салбарынхан бүгд сайн мэдэж байгаа. Тухайлбал, таны манлайлал дор Монгол Улсын БХЯ-ны гадаад хамтын ажиллагаа шинэ түвшинд хүрсэн. 15 улс оронд бид бүхэн батлан хамгаалах атташегийн албатай болсон. Мөн 40 улстай идэвхтэй цэргийн хамтын ажиллагаатай болсон.
Олон улсын энхийг дэмжих ажиллагааны оролцоо маш өндөр түвшинд хүрсэн. 7 улс оронд 720 гаруй энхийг дэмжих ажиллагааны ажилчдад алба хааж байна. Дэлхийн улс оронд энх тайван байдлыг тогтоохын тулд Монголын зэвсэгт хүчин ажиллаж байна. Хамгийн сүүлд гэхэд Хаяти улсад олон улсын цэргийн багийг манай Монголын цэргийн генерал удирдаж байгаа гээд олон чухал үр дүнгүүд гаргаж байгаа.
НҮБ-ын индэр дээр тавьж байсан амлалтаа ч гэсэн бүрэн дүүрэн хэрэгжүүлж чадсан. 2025 онд манай энхийг дэмжих ажиллагаанд оролцсон нийт бие бүрэлдэхүүний 15,6% нь эмэгтэй албан хаагчид болсон байгаа. Түүнээс гадна Монгол Улс өөрсдөө тусламж авдаг байсан гадаадад хүмүүнлэгийн арга хэмжээнд оролцдог болсон. Турк улсад болсон газар хөдлөлтөд нэрвэгдэлтэд манай улсын бие бүрэлдэхүүн оролцож, 8 хүний амийг аварч, 649 хүнд эмчийн үйлчилгээ үзүүлсэн.
Мөн энэ хүний оролцоотойгоор олон чухал үр дүнгүүд болон гадаад хамтын ажиллагаан дээр зэвсэгт хүчин болон төрийн цэргийн байгууллага хууль сахиулах байгууллагууд дээр маш том үр дүнгүүд гарсан. Тэр дундаа цэрэг стратегийн эрх зүйн олон шинэчлэлийг хийсэн. Энэ хүрээнд бид бүхэн Зэвсэгт хүчний цэрэг техникийн шинэчлэл, сэргээн засварлах бодлогыг анх удаа УИХ-аар батлуулж чадсан. Энэ хүрээндээ бид сумны үйлдвэртэй болсон, дрон болоод радио электроникийн төслүүдийг амжилттай хэрэгжүүлж байгаа офицер ахлагчдын мэргэжлийн хөгжил, чадамж, нийгмийн баталгааг шинэ түвшинд гаргахад таны манлайлал өндөр байсан.